আৗগিল সিরজন রেনাঃ কৗহনি 2 - Akhil sirjan Renah Kahani Part - 2 || Post by - Santali Arichali

ধৗরতিরে অকা করে উনকু কওয়াঃ তওয়া জর কঃ আ, অনা করেনাঃ অত্ হাসা দ উনরে আদ লৗবিদ্ কঃ তাঁহেন৷ মিৎ দিনঃ দ অনকাগে ঠৗকুর ঠৗকরৗন তৗকিন হঁ ধৗরতি পুরিরে দাঁড়ান কান কিন অক্ত টাটকাগে উনি ঠৗকুরাঃ বারসি হাপা দ ধৗরতি রেনাঃ মিৎঠেন অনে লৗবিৎ আকান অনকান অত্ হাসা রে গৗডয়ৗও উগুর এনা৷ উনরে ধৗরতি রেনাঃ লৗবিদ্ আকান অনা হাসা ঞেল অনুমান কাতেঃ বৗরসি হাপাতে হুটকুজ রাকাব কাতেঃ চেৎ উইহৗর কাতেচ্ ঠৗকুর দ ঞেলজং তে নাপায় অকজ্ বারয়া গুড়গু লেকানাঃ এ তেয়ার কে-ৎ আ৷ আর অনা দ নওয়া হতেৎ তেয় তেয়ার লেৎ-আ নওয়া লাহারে লিটৗ গঁসাই মিৎ দিনঃ ঠৗকুর ঠেনে নেহর লেৎ— কানা, ঠৗকুর ধৗরতি রে আবন কক মানাও গুনৗও বন-মা অনা লৗগিৎ ক মৗনমি তেয়ার কমসে প্রভু! অনে অনা লিটৗ আঃ কাথা গে উইহৗর দিসৗ কাতে পালেন চ ঠৗকুর দ উনরে অনাকিনে বেনাও লেৎ-কানা৷ মেনখান উইহৗর ভাবিত কাতে হঁ উনরে উনিদ জায় বেনাও কেৎ আ অনাকিন রেমা তি-জাঁগাগে বৗনুঃ আন দ ৷ তি বৗনুঃ জাঁগা বৗনুঃ একাল অনা দ লেপেঢের গে৷ উনরে লিটৗ গঁসাই ঞেল কাতেঃ ঠৗকুরে মেতায় কানা—, প্রভু নুকিনমা তি-জাঁগা বৗনুঃ তৗকিন দ৷ তি-জাঁগা বেনাও আৗকিন খান বাং নাপায় কঃ আ? তখন উনরে ঠৗকুর আদ তি-জাঁগায় বেনাও আদ্ তৗকিনা৷ মেনখান বেনাও সৗত কাতেঃ হঁ জিউয়ী দ উন হৗবিজ্ হঁ বাং এ এমাৎ কিন তাঁহেৎ৷ জিউয়ী বৗনুঃ আন তৗকিন উনকিন বেনাও পুতড়ৗ কিন দ সরগ্ পুরি রেনিচ্ উনি সিঞ সাদম দ চেদ্ মনে কাতে চ মিদ্ দিনঃ এ লেবেদ্ রৗপুদ্ কেৎ কিনৗ৷ লিটৗ গঁসাই উনরেয় ঞেল কিন দ উনকিন ঠৗকুর এ বেনাও লেদ্ কিন পুতড়ৗ কিন মাকিন রৗপুদ্ আকানা৷ এনখান লিটৗ হঁ উনকিন রৗপুদ্ আকান কিন পুতড়ৗ কিনাঃ তি-জাঁগা, হড়ম ক হালাং জাওরা কাতেঃ মৗর দহড়া লেকাতে লাঠা মিদ্ কাতেঃ আরহঁ অঁডে গে অনাদয় দহ হট কাৎ তৗকিনা৷ নংকা কাতেঃ উনকিন হাসা রেন বেনাও পুতড়ৗ কিনাঃ হড়ম দ অনে বারসায় তুরুয় ধাও রৗপুদ্ আর জড়াও লেন তাঁহেৎ কানা৷ অনা তায়ম লিটৗ গঁসায়াঃ নেহরতে উনি বাবা ঈশ্বরগে উনকিন জিউয়ীয় দান আঃ কিন তাঁহে কানা৷ উন উনকিনগে অনে আৗগিল সিরজন রেদ নিগুড়িয়ৗ নিমুড়িয়ৗ মেনতে কিন ছৗটয়ৗর ঞাম লেনা৷ তায়ম দারাম দ উনকিনগে অনে দে বংশ আর জদু বংশ লেকাতে উরুম ঞাম লেনাকিন৷ যাঁহারে দাঃ বৗনুঃ আ অঁডে দ জিউয়ী হঁ বাং পারচাঃ আ, আরজাও হঁ হৗপিৎ রে তাঁহেনা৷ অনাতে আৗগিল সিরজন ধৗরতি পুরি রেদ জমাঃ ঞুওয়াঃ তেনাঃ দ চেৎহঁ গে বাং তাঁহে কানা৷ অনা খৗতির উনকিন নিগুড়িয়ৗ নিমুড়িয়ৗ কিন বাঞ্চাও দহকিন লৗগিৎ তে লিটৗ গঁসাই দ অনা সরগ্ পুরিতে উনকিনাঃ জমাঃ ঞুওয়াঃ আৗগুই লৗগিৎ দিনৗমগেয় চালাঃ তাঁহেৎ, উনকিন বৗগি হট কাতেঃ৷ চেদাঃসে বাবা ঈশ্বর দ উনকিনাঃ হড়মরে জিউয়ী সলং কাতেঃগে উনকিন হারা বুরু কিন লৗগিৎ তেদ উনি লিটৗ গঁসাই গে  আঁগিভার দহ গঃ আদে তাঁহেৎ৷ লেটৗহঁ উনখনগে মনে জিউয়ী কেটেচ্ উরিজ্ কাতেঃ উনকিন হারা বুরুকিন লৗগিৎ এ ছুটৗও এনা৷ সরগ্ পুরিতে উনকিনাঃ জমাঃ ঞুওয়াঃ আৗগু লৗগিৎ চালাওয়ঃ ফাঁকরে জাঁহান চিলি ক উনকিন দ আলুকু বৗড়িচ্ দাড়ে আকিন মা, অনা লৗগিৎ লিটৗ গঁসাই দ ঠৗকুর ঠেন নেহর কাতেঃ সিঞ সেতা আর লৗগরু সেতা মেনতে উনরে বারয়া সেতায় বেনাও হচ লেদেয়া৷ উনকিন সেতা দ লিটৗ বাং তাঁহেন অক্ত নিগুড়িয়ৗ নিমুড়িয়ৗ কিন হরহ কৗকিন তাঁহেৎ৷ লিটৗহঁ দিনৗমগে আদ সরগ্ পুরিতে উনকিনাঃ জমঃ ঞুওয়াঃ আৗগুয় লৗগিৎ চালাঃ হিজুঃ তেগে আদয় লাঁগা চাবায়েনা৷ উনরে লিটৗ গঁসাই আৗডি গান উইহৗর আৗচুর বাড়া কাতেঃ সরগ্ পুরিরেন উনকু বঁগা বুরু ক সাঁও গালমারাও কাতেঃ গটা কেৎ-আ যে,

  মৗরুড় আকান ধৗরতি পুরিরে দাঃ সেতেঞ হচ লেখান আৗডি গে নাপায় কঃআ পালেন৷ আর ধৗরতি পুরিরে দাঃ সেতেঞ হচ লেখান মানাওয়াঃ জিউয়ৗ বাঞ্চাও দহ হঁ আৗডিগে সহলে কঃআ৷ ধৗরতি পুরিরে দাঃ সেতেঞ হচ রেনাঃ কাথা উইহৗর ঞাম কাতেঃগে লিটৗ উনরে সরগ্ পুরিরেন সানাম বঁগা বুরু ক আদয় সাঁও কেৎ কতে ধৗরতি পুরিতে কুঁঞ তাড়াও লৗগিৎ কৗখুওয়ৗ কুডি সাব কাতেঃ আদয় সেটেরেনা৷ উনরে সরগ্ পুরিরেন সানাম বঁগা বুরু কগে অনে ঠৗকুর ঠেন খন কুলি উধৗর তালাতেক বাড়ায় ঞাম কে-আ যে গেলবার চৗঁটিতে সাজাও আকান ধৗরতি পুরি লাতাররে মেনাঃ আন পাতাল পুরিরে দাঃ দ মেনাঃ আকাৎ-আ৷ ধৗরতি পুরিরেয়াঃ চাটি কদ যে লেকা সাজাও আকানা অনা কদ হুয়ুঃ কানা—হাসা, কল্লাচ, লাঠে ধিরি, পোঁড হাসা, জাটাং হাসা, পাঁক হাসা, পোঁড ধিরি, হেঁদে ধিরি, তাঁবা ধিরি, কাঁসা ধিরি, পিতল ধিরি আর মেঁড়হেৎ ধিরি৷ আর অনা ক গেলবার চৗটি তাড়াও পারম লেনখান গে পাতাল রেনাঃ দাঃ দ সেতেঞ রাকাবঃ—আ৷ বাবা ঈশ্বর ঠেন খন বাডায় ঞাম কাতেঃ গে অনে পাতাল রেনাঃ দাঃ সেতেঞ রাকাব হচয় লৗগিৎ সানাম বঁগা বুরু কতে দমে উনরে আদ তাড়াও ক ছুটৗও এনা৷ মেনখান গেলমিৎ চৗটি হৗবিচ্ তাড়াও ইদি কাতেঃগে উনকুদ আৗডি গান রিকৗ কাতেহঁ গেলবার চৗটি অনা মেঁড়হেৎ চৗটৗনি দ একাল আদ বাংগেক তাড়াও পারম দাড়েয়াৎ—আ৷ এনখানগে অনাতে উনরে উনকুদ আদ সরগ্ পুরিরে তাঁহে কানে উনি গজ্ মতি হাতি হহ আৗগু কাতে, অনে ঠৗকুর ঠেন খনকু কয়্ আৗগুলেৎ কান্ বৗরসি হাপা বিৎ কাতেঃ অনা চেতানরে উনি তিঁগু হচ কাতেঃ জোর তেক লেবেদ্ ডুবুজ্ হচ গদ্ কাদেয়া৷ এনখানগে অনা বৗরসি হাপা মা অনা গেলবার চৗটি দ আদয় হুটৗস পারম গৎ কাৎ—আ৷ বৗরসি হাপা হুটৗস পরমেন রেগে পাতালরে তাঁহে কান দাঃ হঁ আদ ভুড় ভুড়ৗও কাতেঃ বুড়কুঞ রাকাব এনা৷ উনরে পাতাল রেনাঃ দাঃ জত বুড়কুঞ রাকাব কাতেঃ ধৗরতি পুরি মা গটায় উনুম এসেদ গৎ কেঃ—আ৷ গটা ধৗরতি পুরি দাঃ তে জলকার চাবায়েনা৷ নিগুড়িয়ৗ নিমুড়িয়ৗ কিন হঁ উনরে চেতান দিসম সেৎ আৗতু চালাও কাতেঃ মিৎটাং ঢিপ্ রেকিন ঢাং এনা৷ সিঞ সেতা আর লৗগরু সেতা কিন দ লিটৗ গঁসায় মঞ্চ পুরি সেৎ এ হুলহুলৗও রাকাব কাৎ কিনৗ, আর উনকিন দ নিতঃ হৗবিচ্ হঁ অনা মঞ্চ পুরি রেগে কিন আৗচুর বিহুরঃ কানা৷ ধৗরতি পুরি জলকার এন সাঁও সাঁওতে উনদ পুরি কঁহ আদ এটাঃ লেকা সাজাও এনা৷ উনদ সাজাও এনা সরগ্ পুরি, মঞ্চ পুরি, জলা পুরি আর লাতার উতৗর রেদ পাতাল পুরি৷ ধৗরতি পুরি জিলৗৎ এনা উনদ পাতাল পুরি সাঁও৷ নঃ—অ নংকা কাতেঃ গে আৗগিল সিরজন ধৗরতি পুরি দ উনরে ধাসাও আৎ লেন তাঁহে কানা ৷৷৷