বাঁহা বঙ্গা - Baha Bonga (পার্ট—১) |

 

বাহা পরব দ খেরওয়াল জৗতি হড় কওয়াঃ আকওয়াঃ ধরম লেকা তেদ অডি মারাং পরব কান তাকওয়া। অৗডি রৗস্কৗ সালাঃ তে নওয়া অক্তদ আকওয়া অনা ধরম ঠাঁও মেনেৎ-দ জাহের থান রে আকয়ি জাহের আয়াে, মারাং বুরু, মড়ে ক তুরুই ক, গোঁসাড়ে, মাঝি বগা আর জাহের থান রেনাঃ মিন্ সেরে মেনায় মাতম বুটৗয় হর-হ আকাৎ গঁসাই এরা, নুকু বগাক মৗন আতে ক মানত কওয়া । বাহা চাঁদো রে চাঁদোয় মােলােঃ লেনখান গে খেরওয়াল জৗতি হড় কদ বাহা। পর-ক সিরজৗও-আ।নওয়া রেনাঃ অক্ত দ বাহা চাঁদো রে চাঁদোয় মােলােঃ এন তায়ম, অনে চাঁদোয় পুরৗও-অঃ কুনৗমী মাহা অনা চাঁদো ভিতরি রেগে হুয় লেনখান; উনরেদ অনা পরব দ অনে কুনৗমী হিলঃ গেক সৗরদিয়া। আর ইনৗ চাঁদোরে চাঁদোয় মােলােঃ এন তায়ম খন কুনৗমী হুয়ুঃ তে এটাঃ চাঁদো তেয় পারম লেনখান, মেনেৎ দ পাতা চাঁদো (চৗত্ বঁগা) রেয় বল লেন-খান উন রেদ চাঁদোয় মােলােঃ এন তায়ম মড়ে মাহা হিলঃ ক সৗরদিয়া । তায়ম তায়ম তে মাপাজি ক অনে নওয়া মাহা মেনেৎ দ মােলোঃ এন তায়ম মড়ে মাহা হিলঃ গে সৗরদি দ নাপায়া মেনতে ক গটা আকাৎ আ। বাহা পর বাং হুয় পারজাৎ আতো অড়াঃ রেন তিরলৗ হড় কদ যাঁহান দারেনৗড়ি রেয়াঃ গে অকা বাহা হঁগে বহঃ রে উনকুদ বাংক রেবেদা। অনকাগে আতাে অড়াঃ করেন সানাম হড় কগে মাতকম রাসা বাংক চেপেজা, নাওয়া সাকাম রেহঁ যাঁহানাঃ ক বাংক জমা। আতো হড়ক নওয়া পরব রেদ পে মাহা জহড়-ক তাঁহেনা। এতহব দ উম নাড়কা, দসার দসৗরদি আর তেসার মাহা দ হুয়ুঃ কানা বাসকে।নওয়া বাসকে হিলঃ গে কড়া হড় কদ বির সেঁদরা ক চালাঃ আ। বির খন যাঁহানিচ গে মিৎ্টাং রেহ (চেঁড়ে চিপরুজ,সৗল সারাম) গচ আগুয়েতে মৗঝি অড়াঃ তেক সেটেরেয়া আরক সামাং এয়া৷ বাড়ায় রে তাঁহেন মা সেঁদরা কড়া ক-ক সেটের লেনখান গে, উনকুদ অড়াঃ বলন লাহা রেক জাঁগা দাঃ কওয়া ..........। সেঁদরা কড়া ক অড়াঃ ক বল লেনখান গেমৗঝি বাবা হঁ আদ মিদ টুকু হাঁডি উনকুয় সাের আকওয়া। হাঁডি ক ঞু বাড়া কাতে আদ সানাম আতো হড় কগে অনা বাস্কে হিলঃ দ, দাঃ আতে ক দুপুল এনেচ আ। কড়া কুড়ি জতম্ কগে ঝপর ঝপর ক দুপুল এনেচ আ। বাহা চাঁদোয় মােলােঃ লেনখান গে আতাে রিনিচ নায়কে দ অনে নেমাচার রে তাঁহেন হুয়ুঃ তায়া। যাঁহানাঃ ছুঁত ক খাতির আতো রেনাঃ বাহা পরব বাং হুয় লেনখান নেডা গটা মাহা তায়ম হঁ উনরেদ বঁগাঃ বুরুঃ দ গানঃ আ। মেনখান নায়কে দ আদ অনে যাঁহা আতো করে বাহা ক হুয় আকানা অনা করেনাঃ দাঃ ক পারজাৎ একাল গে উনরেদ আদ বাং এ ঞু দাড়েয়াঃ আ । ছুঁত ফেড়াও তায়ম আজাঃ আতাে রেন বগা বুরু ক বাং পেরেচ পারজাৎ উনিদ অনকাগে নেমাচার রে তাঁহেন হুয়ুঃ তায়া। অনা বেগর আতাে হড় কহঁ অনে যাঁহাদ লাহা রেগে লৗই আকানা, যাঁহান দারেনৗড়ি করেনাঃ বাহা ক বহঃ রে বাংক রেবেদা। অনা কৗমি বাং চিকৗড় পাৰ্য্যাৎ নাওয়া সাকাম রে জম আর বাং মাতকম রাসা চেপেচ্ কদ উনুকহঁ একালগে বাং গানঃ তাকওয়া। বাহা বঁগা আর মাঃ মড়ে বঁগা দ মি আনগেয়া । বানার অক্ত রেগে উনকু বঁগা কগেক পেরেচ কওয়া। বাহা রেদ কৗটিচ দাঁড়ে আর মাঃ মড়ে রেদ সেঁড়া দাঁড়ে ক এম কওয়া। বাহা দ বাহা চাঁদো সেটের লেনখান গে বঁগাঃ তেগে হুয়ুঃ আ আর মাঃ মড়ে দ মড়ে সেরমা ফারাক ফারাক উনকু বঁগা কগে...সেঁড়া দাঁড়ে এম কাতেৎ বধাও ক হুয়ুঃ আ। অকা সেরমা ক মাঃ মড়েঃ আ, ইনৗ সেরমা দ বাহা ইদি কাতে, জাহের থান রে নায়কে দএখেন সুনুম সিঁদুর আতে সারজম বাহা মাতকম গেলে খঁড-রে আঁড়গাে লেখান গেয় গানঃ আ । উন অক্ত রেদ দাঁড়ে অতি দ বাংলৗকতিঃ আ, মেনখান সুনুম সিঁদুর আঁড়গাে অক্ত বঁগা ক লৗই সাডেয়াক হুয়ুঃ আ, “উমুক দিনতে সেঁড়া দাঁড়ে লে সাের আপেয়া”। মাঃ মড়ে দ সেঁদরা চাঁদো (বৗইসৗক বঁগা) রেনাঃ কুনৗমী খন এতহব কাতে এরসিৎ চাঁদো রেনাঃ আঁবা-বতি হিলঃ হাবিচ ক বঁগাঃ আ। দিশম মাঃ মড়ে রেনাঃ সৗরদি মাহা দ অনা সেঁদরা চাঁদো রেনাঃ কুনৗমী হিলঃ গে গটা আকানা। যাঁহান এটকেঁটড়ে সেটের লেনখান অনাদ অনা আঁবা-বতি হিলঃ হাবিচ ক অৗতরিয়া। বাহা চাঁদো রেহঁ অনা বাহা বঁগাঃ সাঁওতেগে সেঁড়া দাঁড়ে এম কাতে বঁগা ক বধাও ক গানঃ আ, অনা দক মেতাঃ আ “বাহা মাঃ মড়ে” । বাঁহা বগা রেনাঃ নেয়াম নেমাচার আর সিরজৗও কৗমি হরা — সেতাঃ খন গে নায়কে এরা সাঁওতে আতাে রেন তিরলৗ হড়-ক লুগড়ি লাপাে ক তেকে সবৎ ফারচায়া। কড়া কুড়ি সানাম কগে উম ফারচা নাড়কা ফারচাঃ আক। নায়কে-দ বগা সাপাপ ক দাঃ ঘাটরে ইদি কাতে এ অরুব ফারচায়া। আতাে রেন কড়া গিদরৗ কদবির তেক চালাঃ আ, সারজম টৗওরৗঃ মাঃ অণ্ড লৗগিৎ। বির খন সারজম ঢৗওরৗঃ মাঃ আগু কাতেৎ জাহের সৗড়িম ক দাল-বা (জাহের সৗড়িম দ পুব পছিম তেক দাল-বা, সৗড়িম দ পুছিম সেৎগে আঁড়গাে তাঁহেনা)। মাঃ-মড়ে আর বাহা বগাঃ রেদ পে ঠেন জাহের সৗড়িম ক তেয়ারা । অনে সারজম বুটৗরে মিদটাং, অনা দ জাহের এরা, মারাং বুরু আর মড়ে ক তুরুই ক লৗগিৎ তে। অনা খনাঃ জজ (এতম) তি সেৎ সাহা ঞঃ রে, গোঁসাড়ে ঞুতুম তে। আর মিদটাং দ জাহের টান্ডি রেগে বল গদঃ লেঁগা তি সেৎরে মৗঝি বঁগা ঞুতুম তে। গোঁসাড়ে আর মৗঝি বঁগা দ ঝিরি হিরি চাতম বিৎ অৗকিন রেহঁ গানঃ গেয়া (মিদ্টাং সারজম ডৗর বিৎ কাতে খড়তে চাতম লেকা ক দালবা)। অনা তায়ম জাহের থান ঠেন পেয়া গাঁডো মৗচি ক বেনাওয়া। গোঁসাড়ে আর মাঝি বঁগা আঃ থান ঠেন দ মিদটাং কাতেঃ ক বেনাও আ ৷ অনা কৗমিক সাত বাড়া কাতে আতাে রেন কড়া গিদরৗ কদ আদ অড়াঃ তেক রুওয়ৗড় চালাঃ আ । তারাসিঞ বেড়া অৗয়ুব অৗয়ুব নায়কে দ তেকে সব লুগড়ি তে ভাগওয়া পাঠে কাতেৎ, জাহের রে সেন কাতে জতম্ বঁগা থান এ্য গুরিচ ফারচায়। তিনৗঃ বঁগা থান মেনাঃ আকাৎ আ, জত ঠেন উনকু ঞুতুম কাতে পে টিউৗঃ কাতে সুনুম সিঁদুর এ টিডৗগা। অনাদ উনকু ক ঞুম তালাতে ইনৗ হিলঃ লেকাতে জতম এ্যা চেঁহেগাও রাকাব কেৎ কওয়া। ইনৗ কাতেগে নায়কে হঁ আদ অড়াঃ এ্য রুওয়ৗড় হিজুঃ আ। অড়াঃ রে রুওয়ৗড় হেচ কাতে নায়কে-দ তালা রাচা রে মিঠেন গুরি ফারচা কাতে থান এ্য তেয়ারা। অঁডে অড়াঃ ভিতরি খনাঃ বঁগা সামান সাঁওতে সাপাক হাটাঃ রে হেরমেৎ কাতে উড়ুক অণ্ডয় তে দহয়ায় । অনা থান রে উনকু বঁগা ক দিশৗ কাতে পে টিডৗঃ কাতেৎ সুনুম সিঁদুর এ্য টিডৗগা আর বঁগা সাপাপ করেৎহঁয় সিঁদুরাঃ-ইনৗ হিলঃ লৗগিৎ তে অনা থানরেগে জাহেররে চালাঃ লাহারে বঁগাবুরু-ক অড়াঃ খন উড়ুক কাতে অঁডে উনিদয় থৗমিৎ কেৎ কওয়া। অঁডে খন গে জাহের তে ইদি হুয়ুঃ আ। নায়কে দ মিৎ ঞিদৗ অঁডেগে অতরে দুডুব কাতে এ্য হর-হ আঁগায়া । পারকম্, পৗটিয়ৗ চেৎ হঁ বেওহার দ বাং গানঃ তামা। মেনখান আঞ্চার তেৎ আটেৎ-দ গানঃ আ । আতাে সানাম হড় আয়ুব তরা খনগে বঁগা আঁড়হে আদ ক এতহবঃ আ। বাবা হড় কদ তুমদাঃ টামাক আর আয়াে হড় কদ সেরেঞ এনেচ তালাতে বঁগা কক আঁড়হে কওয়া। কড়া হড় কদ ক দন্ এনে আঁগায়া।

এতহব রে উম্ নাড়কা ইদি কাতে আঁড়হেঁ সেরেঞ (রাহা দ ‘বাহা) “—— অকয় দ গােয় স-সবৎ কান হাে...... জা গঁসাই শশ ঘৗটি ঘাট রে? অকয় দ গােয় উমে নাড়কাঃ কান হাে... জা গঁসাই মেরাল ঘৗটি ঘাট রে ?

“”নায়কে এরায় স-সবৎ কান হাে... জা গঁসাই শশ ঘৗটি ঘাট রে, নায়কে হেরেল এ্য উমে নাড়কাঃ কান হাে জা গঁসাই মেরাল ঘাঁটি ঘাট রে ।

উমে রেদ হাে নায়কে নাড়কা রেদ হাে। আগুয়ালাং হাে নায়কে অতেগর হাসা,

আট ঘৗটি রে নায়কে নাড়কা গিডিয় মে,

মেরাল ঘৗটি রে নায়কে হসর গিডিয় মে৷

আট ঘৗটি রে নায়কে নাড়কা গিডিয় মে,

মেরাল ঘৗটি রে নায়কে হস গিডি মে।”

বাবা হড় কক রু তড়াওয়া, আয়াে হড় ক-ক এনেচ আ, কড়া হড় কদ কুল-কুলি কাতে ক দনা। রু দ বাহা গে। অনকা কাতে গে আদ আখড়া ক তারকাও ইদিয়া......... “সেরেঞ রাহা দ অনা কগে”

ধিরি গড় সিনি ধিরি গড় সিনি,নতে ধিরি গড় সিনি, ধিরি গড় সিনি, ধিরি গড় সিনি, রতন মা কাপাট।(তেলায়াক আর ক তড়াওয়াঃআ)

লুগু মা বুরুরে যা গঁসাই ধিরি গড় সিনি, ঘান্টা মা বাড়ে রে, যা গঁসাই রতন কাপাট । ঝি উডুক্ কম সে ছিতৗ এঁড়ে-কদ রাড়া উডুক্ কমসে কৗপরী দরপতি তুরুই কদ। অনে আদ সেরেঞ মুচৗৎ লেনখানগে আদ ক তড়াও অচুরা। অনা তায়ম এনেচ ক লাগায়া । বঁগা ক বাংক হিজুঃ রেদ আর ক সেরেঞ-আ — “লিচৗ চৗরহােড়ি জা গঁসাই বাড়ে লাড়ে রেদ,

চেলে জা লিটৗম তাঁড়াঃ আদে বাড়ে লাড়ে রে। (এটাঃ ক ক তেলায়া আর রুরু ক ক তড়াও গ কাঃ-আ)লিচৗ চৗরহােড়ি জা গঁসাই বাড়ে লাড়ে রেদ, সুকরি গে জাঞ তাঁড়াঃ আদে বাড়ে লাড়ে রে।”

নঃ অয় আদ নঃঅ নংকা এনেচ সেরেঞ তালা তেগে বঁগা কক আঁড়হেঁ সেটের কওয়া। বঁগা ক ক সেটের লেনখান, উনকু বঁগা কদ আপান আপিনাঃ সাপাপ ক আক তেগে ক কয় হাতাও জং-আ। মারাং বুরুয় সাব-আ সামানম্ কৗপি, জাহের এরা সিকড়ি সাকম এ্য হরগ্ তে কৗহডুম চেতান রে দীওড়ায় দিপিলা আর তিরে সাব কাঃ-আয় জনঃ, আর মড়ে ক তুরুয় কদয় সাব-আ আঁঃ সার। বঁগা ক সানাম কৗমি হরা কক ঞেল সােঝে হচ কওয়া, আর বুগিঃ কানা সে বাড়িজঃ কানা অনা কক কুলি উধৗর কওয়া । সানাম রুম বঁগা কগে জাহের থান কক এেল আঁচুরা। জাহের থান খন বঁগা কক রুওয়ৗড় হেচ লেন খান আদ নায়কে দ সানাম বঁগা কগে জাঁগায় অরুব কওয়া। অরুব পুরৗও কতে সারেজ আকান দাঃ দ বহঃ রেয় দুল আকওয়া। উনরে জাহের এরা জাঁহায় এ রুম আকানা উনি হঁ অনকা গে জাঁগায় অরুব কওয়া। মাড়াং পেড়া তেদ এ মঁড়ে ক তুরুয় ক, অনা তায়ম মারাং বুরু অনা সাঁওতে নায়কেয় অরুব এতে সারেজ আকান দাঃ দ উনি হঁ নায়কেয়াঃ বহঃ রেয় দুলা। উনরে আদ মৗনমি ক সাঁওতে বঁগা কহঁ ক রৗস্কৗ এনেজ-আ।

বিঃদ্রঃ— অল দ লেতার জারি মিনাঃ আ

আডি লগন গে দসার সাকাম লে উছৗনাঃ