মৗনমি চেতান ঠৗকুরাঃ রৗগি সেঁগেল দাঃ জৗড়ি
লিটৗ আঃ তুনখিরে মৗনমি আরহঁ অৗডিক সাঁগে ইদিয়েনা, ধৗরতিপুরী গট ক টাপাও কেদা । লিটৗ হানা নওয়া ছলতে মৗনমি সাঁও মেসায় তাহেঁনা । তায়ম দারাম আদ মৗনমিয়াঃ মানাও বাতাও বাং তাহেঁ লেনা । লিটৗ গঁসায় শিখৗও কাথা হঁক তালম পারম কেদা । যাহাঁ লৗগিৎ ঠৗকুর মৗনমিয় সিরজন লেৎ কওয়া, অনা কাথা মৗনমি ক হিড়িঞ কেদা । বঁগা বুরু বাং দেবা-সেবা কাতে মৗনমি আকওয়া লাচ গেক পাখাও কেদা । বয়হা সৗগৗই হিড়িঞ কাতে মিৎ পৗরিস রেন কড়া-কুড়ি ক লটি-ঘটি রেক পাড়াও এনা । বয়হা সৗগৗই ক ধুরিয়াদা । কৗয়-গুনহৗ রে মৗনমি ক ডুবুচ এন খান ঠৗকুর অৗডি জোরে এঁদরে এনায় । মৗনমি ধাসাও ক রেনাঃ এ গটা কেদা । মেন কেদায় - "নুকু পৗপী মৗনমি দঞ ধাসাও গিডি কাকওয়া । যাহাঁ লৗগিৎ মৗনমিঞ সিরজন কেৎ কদ, মৗনমি অনা ডাহারতে বাং ক তাড়াম লেদা । বৗড়িজ কামিরে মৗনমি ক বৗয় এনা । ইঞ বাং ক মানাও-বাতাও লেদিঞা । নুকু দ দহ কাতেগে চেৎ ? সেঁগেল দাঃ জৗড়ি কাতে নুকু মৗনমি দঞ ধাসাও কওয়া, পোহোঞ আড়াঃ কওয়া । রোগ আজার অড়সং কাতেঞ মুচৗৎ কাকওয়া"।
ঠৗকুরাঃ নওয়া এঁদরে মেসা রোহেৎ ঠৗকরান আঃ লুতুর রে বাজাও এনা । খান ঠৗকরৗন অৗডি নেহর আতে ঠৗকুরাঃ তিয় সাব গৎ কেদা । নেহর সালাঃ ঠৗকরৗন, ঠৗকুর এ মেতাদেয়া - "হে ঠৗকুর ! দেন আমাঃ রৗগি লাড়েজ তাম, মৗনমি চেতান খন আমাঃ এঁদরে সাহায় তাম । অৗডি মেহনুত কাতে আলাংরেন সিরজন বঁগা-বুরু আতে নওয়া ধৗরতিপুরী তেয়ার আকানা । অনা ধৗরতি পুরি খোলোন লৗগিৎ আলাংরেন সরেস সিরজন মৗনমি লাং সিরজন আকাৎ কওয়া । নিতঃ নুকু মৗনমি ধাসাও গিডি কাকো দ কাথা অৗডি বৗড়িজঃ আন । মৗনমি আলম ধৗসুড় কওয়া । হাপে সে ইঞ লিটৗঞ হহ আয় কানা । অৗলিঞ লিটৗ তৗলিঞ মৗনমি ধরম ডাহার তেলিঞ অৗগু রুয়ৗড় কওয়া । আলাং রেন হপন কানা ক, বাং বাডায় কাতে ক কৗয় গুনহৗ আকাদা, দেন ইকৗ কাকো মে"!
ঠৗকরৗনাঃ নওয়া নেহর রে ঠৗকুরাঃ রৗগি লাড়েজ এনা । ঠৗকুর আয়াঃ ন
ওয়া রাঁগাও খৗতির লাজাও এ আটকার কেদা । উইহৗর কেদায়-সৗরি-গেত, মৗনমি তালারে কড়া হপন রূপতে আচ আর কুড়ি হপন রূপতে ঠৗকরৗন এ মোলোঃ আকানা । নুকু মৗনমি ধাসাও দ বৗড়িচ অঃ গেয়া । মেনকেদায় - "হেঁ তবে ঠৗকরৗন, মা লিটৗ আতে মৗনমি আলাং দেবা-সেবারেম বৗয় লেক খান মা বোগেঃ গেয়া । মা এনখান বৗঞ ধৗসুড় এৎ কওয়া"।ঠৗকুর মৗনমি চেতান খন আয়াঃ এঁদেরেয় সাহা কেৎ তায়া । মেনখান ঠৗকুরাঃ মচা রেনাঃ বাকখো বাং এড়ে তায়া । মাহা দাড়েমান ঠৗকুর ! স্বরগপুরী, মঞ্চপুরী, পাতালপুরী সানামগে আয়াঃ চুপুৎ ভিতরিরে । চাঁদো, বেড়া, ইপিল, এঁগেল ঝতম আয়াঃ গে সিরজন । আয়াঃ উইহৗরতে, আয়াঃ পরিচালন তে সানামাঃ চালাঃ কানা ! উনিয়া কাথা কিন এড়ে- আন ?
ঠৗকুরাঃ বাখখো সাঁওতে সিঞবির মানবির রে সেঁগেল দাঃ জৗড়ি এহব এনা । গেলবার সিঞ গেলবার ঞিদৗ সেঁগেল দাঃ জৗড়ি রেগে তাহেঁয়েনা । অনা বেতার তে বঁগা হুমটি রে নংকা ক সেরেঞ আকাদা -
"অকয় যাপে জুঁডিয়াদা দেশ দ ?
অকয় যাপে আতার আদা দিশম দ ?
দেশ দরে ল-লৗটিজ এন দ
দিশম দরে হাসায় ডিগির এদা ॥
ঠৗকুর গেচয় জুঁডিয়াদা দেশ দ
ঠৗকুর গেচয় আতার আদা দিশম দ !
দেশ দরে ল-লৗটিজ এন দ
দিশম দরে হাসায় ডিগির এন ॥
দেসে ঠৗকুর জৗড়ি মেসে দাঃ দ,
দেসে ঠৗকুর জারগে মেসে জৗপুৎ দ !
দেশ দরে ল-লৗটিজ এন দ
দিশম দরে হাসায় ডিগির এন"॥
দাঁশায় রেনাঃ পরতন
আর হঁ ঠৗকুরাঃ বখখো সাঁওতে মৗনমি হানা নওয়া রোগ আজার রেক পাড়াও এনা । ঠৗকুর পোহো, মেনেক জিবানুয় আড়াঃ কেৎ কওয়া । মেনখান মৗনমি বাক গচ-গুর লেনা । ঠৗকরৗনাঃ কাথাতে মৗনমি চেতান ঠৗকুরাঃ দায়া হোয় এনা । সিঞবির মানবির রেনাঃ সেঁগেল তারাস ঞেলতে মৗনমি ক লাপা-লোপো চাবায়েনা । পোহো মেনেক জিবানুতে ধৗরতি পেরেচ এনা । ঠৗকরৗনাঃ- কাথা বাতাও কাতে ঠৗকুর মৗনমি বাঞ্চাঃ হর রেয় তিঁগু কেৎ কওয়া ।
আদ ঠৗকরৗন জাহের বুঢি হহ কাতে মেতাদেয়ায়- "এ জাহের ! লিটৗ দয় অকায়েনা ?
জাহের বুঢি মেনকেদা- "এ আয়ো ! লিটৗ দ মঞ্চপুরী রে মৗনমি সাঁওগেয় আঁগা-অৗয়ুবঃ কানা । তিনরে চ সরগপুরী এ হিজুঃ, বায় হিজুঃ, ঠিকৗন বৗনুঃ তায়া"।
-"মঞ্চুপুরী রেনাঃ সিঞবির মানবির রেমা সেঁগেল দাঃ জাড়িয়েনা, আচ দ চেৎ মঞ্চপুরী রেদয় চিকৗয়েদা ? আম দ দো লগন গে মঞ্চপুরী খন লিটৗ খঁজ অৗগুয়েম"।
খান জাহের এরা লিটৗ তলাস মঞ্চপুরী তঁড়ে সুতৗম তেয় আড়গোয়েনা । মঞ্চপুরী রে লিটৗ পাঁজা ঞাম কাতে নিতঃ গে আজ সাঁও স্বরগপুরী সেন এ মেতাদেয়া । অনাগে বঁগা হুমটিরে নংকা ক সেরেঞ আকাদা -
"ইচৗঃ পিড়, ইচাঃ বৗবু লঃ-কান,
জৗনুম পিড়, জৗনুম বৗবু লঃ কান,
সেরমা রে গিদি তুকৗ, লঃ কা,
দেলাং বৗবু দেশ দরবার ॥
সিঞ বির দোঁগয় দোঁগয় লঃ কান,
মান বির মডঃ মডঃ লঃ কান
মৗনমি আঃ জিউয়ী যতা লঃ কান
দেলাং বৗবু দেশ দরবার"॥
অনকা মেন কাতে জাহের বুঢি বকত তেৎ লিটৗ মঞ্চপুরী খন তঁড়ে সুতৗমতে রাকাব কাতে স্বরগপুরী রে ঠৗকরৗন ঠেন ইদিকেদেয়া । ঠৗকরৗন ঠেন সেন কাতে, জহার আদেতে লিটৗয় মেন কেদা- "হেঁ য়ু ! ইঞ এম তলাস আকাদিঞৗ ?
ঠৗকরৗনে মেন কেদা- "হোয় লিটৗ আম ইঞ তলাস আকাৎ মেয়া । হেঁদা লিটৗ ! আম দ মঞ্চপুরীরে মৗনমি সাঁও গাতে তাহেঁ কাতে চেৎ দম চিকৗয়েদা ? মৗনমি ধরম করম কলসা মঁগাল কাতে বৗড়িচ কৗমি রেক বৗয় এন দ ! চেৎ আম দম শিখৗও পাড়হাওয়েৎ কওয়া"?
- হেঁ য়ু যতগেঞ বুজ তিয়ুঃ এদা । মেনখান চেৎ ইঞ চিকৗয়া ? আপালহেৎ তে ধরম কাথা কঞ শিখৗও পাড়হাও এৎ কওয়া । এনহঁ কাথা ক তালম পারম এৎ গেয়া"।
"নতে ঠৗকুর মৗনমি ধাসাও গিডি ক লৗগিৎ মৗনমি রে রোগ-আজার এ সং আৎ কদ, সিঞ বির মান বির রে সেঁগেল দাঃ জৗড়ি কেৎ দয় ! বিচকম মৗনমি গেক চাবা লেনখান, অকয়দম অৗয়ুর সোতোঃ কওয়া ? অনাম উইহৗর আকাদা লিটৗ"?
ঠৗকরৗনাঃ নওয়া কাথারে লিটৗয় মেনকেদা-"এনখান চেৎ হোয়েঃ আ আয়ো"?
-"আঁজম মে লিটৗ, অনা লৗগিৎ গেঞ হহ অৗগু হচ আকাৎ মেয়া । ইঞ ঠৗকুরাঃ মৗনমি চেতান এঁদরেঞ রাড়েজ হাতাড় আকাৎ তায়া । আদ মৗনমি বায় ধৗসুড় কওয়া । মেনখান ঠৗকুরাঃ রৗগি তারাস তে সিঞবির মানবির রে সেঁগেল জুঁডি আকানা, ঠৗকুর পোহো মেনেক জিবাণুয় আড়াঃ কেৎ কওয়া, মৗনমি রোগ-আজার রেক পাড়াও আকানা । ইঞ ঠৗকুর কাথাঞ এম আকাওদেয়া যে অৗলিঞ লিটৗ তৗলিঞ এঁগা-হন মৗনমি ধরম ডাহার রে অৗগু কওয়া লিঞ"।
-"নাপায় আকাদম আয়ো ! ঠৗকুরাঃ রৗগিম রাড়েজ আকাৎ তায়া । নিতঃ ইঞ চেৎ ইঞ চিকৗয়া আয়ো"?
-"আম মৗনমি তালাতে সেনঃ মে দো লিটৗ । নে ইঞাঃ সাপাপ সাজ্ শৗড়ী, শাংখা, আয়নম-কাজল, সুনুম-সিঁদুর বাকড়ে মুদৗম ইদিমে, আর ঠৗকুরাঃ সাপাপ লিফুর, পায়গন, কলগা (মারাঃ পিঞচৗর) ইদি কাতে মৗনমি চাল আকমে । একেন কড়া গিদরৗ অৗলিঞ আঃ নওয়া সাপাপতে সাজ কাতে, দাঁসায় চাঁদো মোলোঃ খন মড়ে মাহা আড়াঃ কাতে, মঁড়ে মাহা অৗলিঞ আঃ এনেজ সেরেঞ গুন লিলৗ গাহাও হচ কম । আদম-দ ঠৗকুর সাজ হচ কম, আদম ইঞ ঠৗকরৗন সাজ হচ-কম । স্বরগপুরী খন গেলবার গটাং গুরু বঁগা মঞ্চপুরীতে ইদিকম । নুকু বঁগা মৗনমি রান-মুরগৗন ক সেঁড়া আকওয়া । এনেচ সেরেঞ ক সেঁড়া আকওয়া অনা রানতে মৗনমিয়াঃ রোগ-আজার বেসঃ আন । মৗনমি ক বাঞ্চাও অঃ আ । অৗলিঞাঃ এনেচ সেরেঞ রে , নুকু বঁগা ক অড়ঁহে কমা আর ইঞাঃ সাঁদেশ সুনুম সিঁদুর মৗনমি অড়াঃ অড়াঃ ক আসেন মা । এঁডেখান স্বরগপুরী খন ঠৗকুর নওয়া লিলৗঞ উদুঃ আয়া । ঠৗকুরে তিরপিৎ লেনখান সিঞবির মানবির রেনাঃ সেঁগেল অৗড়িজঃ আ । নুকু গুরু বঁগাক- ধরম গুরু, কামরু গুরু, ভুয়ৗং গুরু, সিধ্হ গুরু, সিদো গুরু, গাঁডো গুরু, চেমেঞ গুরু, নরসিঞ গুরু, কাঁসায় গুরু, ভায়রো গুরু, ভেঁডরা গুরু, রহড় গুরু এমান এমান গেলবার গটাং বঁগা ক দাঁশায় এনেচ সেরেঞ তালাতে অড়াঃ অড়াঃ আসেন কাতে, অড়াঃ পিছু হোড়ো চাওলে মৗনমি তলাও হচ কম । অনা চাওলে সোড়ে কাতে সানাম মৗনমি ক হৗটিঞ জম লেখান আজার বেসঃ তাকওয়া । আর যাহাঁয় ক নুকু দাঁশায় এনেজ ক হোড়ো চাওলে ক এমা কওয়া, এমঃ হড়াঃ হঁ সোস-সাহার হোয়ো আ । নুকু গুরু বঁগা ইঞাঃ সুনুম সিঁদুর এমান খানগে অৗলিঞ ঠাকুর তৗলিঞ দেবা-সেবালিঞ ঞামা । দাঁশায় দাঁড়ান সুনুম সিঁদুর তালাতে, ইঞ মৗনমি অড়াঃ অড়াঃ ইঞ দাঁড়ানা"।
লিটৗয় মেন কেদা - "তৗয় গে হোয়োঃ আ আয়ো ! অৗবিনাঃ মাহাত্ব পাশনাও কাতে মৗনমি বৗঞ্চাও ক লৗগিৎ গুরু বঁগা ক আতে মঞ্চপুরী তেঞ সেনঃ কানা । মৗনমি তালারে মৗঝি সাব কাতে অৗবিন ঠৗকুর-ঠৗকরৗনাঃ কাথা মৗনমিঞ গাহাও হচ কওয়া । দেন অৗবিনাঃ সাজ-সাপাপ এমৗঞ মে আয়ো, মঞ্চপুরীঞ সেনঃ আ"।
ঠৗকুর আর ঠৗকরৗনাঃ সাজ-সাপাপ সাব কাতে লিটৗ মঞ্চপুরীয় সেন এনা । মৗঝি হাড়াম সাব কাতে দাঁশায় এনেচ এ পরত্তন কেদা । লিটৗ উদুঃ সেঁড়া লেকাতে আদম কড়া ক ঠৗকুরাঃ লিপুর পায়গান ক হরঃ কেদা, ঠৗকুরাঃ ইল কলগা বহঃ রেক তল কেদা । আদম কড়া দ ঠৗকরৗনাঃ সাজ সাপাপ ক শাড়ী-শাংখা, সাকম-মুদৗম, আয়নম-কাজল এমান ক হরঃ কেদা । (সুনুম সিঁদুর শাংখা, আয়নাম-কাজল, মুদৗম নুকু দ স্বরগপুরী রেন কুড়ি বঁগা কানাক । নুকুদ ঠৗকরাৗনাঃ হড়ম দেহরে তাহেঁ কাতে অঙ্গ ক সভায় তায়া ।) মেনেক আদম ঠৗকুর ক সাজ এনা, আদম ঠৗকরৗন ক সাজ এনা । ভুয়ৗং আঁঃ ক তেয়ার কেদা । আদম দ ঝৗয় করতাল ক সাব কেদা । আদম দ ত্রিয়ো বানাম ক সাব কেদা । মৗঝি রাচারে মৗঝি হাড়াম গুরু বঁগা ক ঞুতুমতে সুনুম সিঁদুর এ আঁড়গো কেদা । পৗয়লৗ ধরম গুরু, ইন তায়ম কৗমরু গুরু, ইনৗ তায়ম ভুয়ৗং গুরু ,, এমান এমান গুরু বঁগা সুনুম সিঁদুর ক টিডৗঃ আৎ কওয়া । স্বরগপুরী সে সেরমা পুরী খন গুরু বঁগা মঞ্চপুরী তেক আঁড়গো হেজ এনা । ঝৗয় করতাল ভুয়াং রেনাঃ সাডে তারকো তে মঞ্চপুরী তালতালাও কাতে অনা সাডে সেরমাপুরী আর পাতলা পুরী ধৗবিচ তারকোয়েনা ।
গুরু বঁগা আর মৗনমি মিৎ সাঁওতে ক এনেচ সেরেঞ কেদা । বঁগা আর মৗনমি ক মুদরে গুরু চেলা সৗগায় ক তল আনা । সিঞবির মানবির রেনাঃ সেঁগেল তারাস আর রোগ আজার নাড়া-পিড়ৗতে মৗনমি ক থাকাও আকান খৗতির সেরেঞ অঁড়হেঁ রে পৗয়লৗরে হায়, হায়, কাথাগে ওডোক এন তাকওয়া । পৗয়লৗরে আখড়া ক জাগাও কেদা -
(দাঁশায় সেরেঞ)
"হায়রে হায়রে
আখড়া জাগাও লালমৗটি লাগলা-ফুল ।
দুয়ৗরি জাগাও লালমৗটি লাগলা ফুল ।
লালমৗটি সারাম লুতুর ধরমে দুয়ৗর ।
হায়রে হায়রে
আখড়া কেগো যাইবে গুরুহো,
লালমৗটি লাগলা ফুলা,
দুয়ৗরী কেগো যাইবে চেলা হো,
লালমৗটি লাগলা ফুলা,
লালমৗটি স্বরগপুরী ধরমে দুয়ৗর"॥
অনা তায়ম গুরু বঁগা ক বাহের কেৎ কওয়া । অনারে নংকা ক সেরেঞ কেদা -
(দাঁশায় সেরেঞ)
"হায়রে হায়রে
ওঠেল ওঠেল ধরম গুরু
ওঠেল ওঠেল ধরম চেলা
গুরু হো, গুরু হো চলবন দিশমতে ।
হায়রে হায়রে
ওঠেল ওঠেল কামরু গুরু,
ওঠেল ওঠেল কামরু চেলা,
গুরু হো, গুরু হো চলবন দিশমতে ।
হায়রে হায়রে
ওঠেল ওঠেল ভুয়ৗং গুরু
ওঠেল ওঠেল ভুয়ৗ চেলা
গুরু হো, গুরু হো চলবন দিশমতে"
(নংকা ঝত গুরু ক ঞুমঃ আ ।)
ঝৗয় করতাল ভুয়ৗং রেনাঃ সাডে গটা তারকোয়েন বেতার তে নংকা দাঁশায় ক সেরেঞ কেদা -
"হায়রে হায়রে,
আতমা পাতারে গুরু হো ভুয়ৗং সাডে কান,
হায় হায়, সেরমা চটেরে চেলা হো কাঁসায় রাঁওয়াঃ কান ।
হায়রে হায়রে,
দেশ দাঁড়ান লগৗৎ গুরু হো ভুয়ৗং সাডে কান,
হায় হায়, দিশম সাঁঘার লৗগিৎ চেলা হো কাঁসায় রাঁওয়াঃ কান ।
হায়রে হায়রে
সুনুমে সিঁদুর লৗগিৎ গুরুহো ভুয়ৗং সাডে কান,
হায় হায়, বাহা টুসৗ লৗগিৎ চেলাহো কাঁসায় রাঁওয়াঃ কান ।
হায়রে হায়রে,
দেশ রেগে গুরুহো সুনুমে সিঁদুর দ,
হায় হায়, দিশম রেগে চেলাহো বাহা টুসৗ দ ।
হায়রে হায়রে,
পে টিডৗঃ গুরুহো বসমতা রে
বার টিডৗঃ গুরুহো ভুয়ৗং ডৗন্টিজ রে,
হায় হায়, মিৎ টিডৗঃ চেলা হো কাঁসায় তালারে"।
মৗঝি থানরে অনকা পে আখড়া এনেচ কাতে আতো সাঁঘার ক ওডোক এনা । অনা আতোরেনহঁ পোয়লো মৗঝি অড়াঃরে এনেচ কেদাক । উনি মৗঝিয়াঃ রাচারে অৗগু তরা আকাৎ বঁগা সারেচ সুনুম সিঁদুর ক টিডৗঃ আদা । মেনেক অঁডে হঁ গুরু ক আঁড়গ কেৎ কওয়া । এনেচ সৗত কাতে গুরু বঁগা সিদৗ ক এমাৎ ক খান ; অনা আতোরেন মৗঝি হাড়াম মৗঝি বুঢি ক গঁড আৎ কিনা । অনা তায়ম আদ অনা আতোরেন গুনি-গুরিব আঃ রাচারে দাঁশায় ক এনেচ কেদা । বাখোল বলন জহঃ ছটকা রেক সেরেঞ কেদা -
"হায়রে হায়রে,
সিলিপিঞ ঝিজ পে গো
টৗটি লাডাক পে,
হায় হায়, দারায় কানালে
হায় হায়-দাঁশায় দাঁড়ান ক"।
বাখোল রে বল কাতে আখড়া জাগাও কাতে আর হঁ ক এনেচ কেদা । সেরে
ঞ রে আক যে নাড়া-পিড়ৗ রেক ঞুর আকান-অনাক কাথা ক অঁড়হে ওডোক এন তাকওয়া । সিঞবির মানবির রে সেঁগেল দাঃ জৗড়ি রেনাঃ কাথা হায় হায় কাতে ক অঁড়হেঁ কেদা - (দাঁশায়)
"হায়রে হায়রে-
লাও-লাখান জামকি সেঁগেল হায়রে হায়,
অকয় যাপে জুঁডি আদা-হায়রে হায়,
সিঞবির দ ল কান দ হায়রে হায়,
মানবির দ হাসায় ডিগিরেন......।
হায়রে হায়রে -
দেসে ছিতৗ দেসে কৗপরৗ হায়রে হায়,
জারগে দাঃ দ নতে বিন হায়রে হায়,
তারসে রাকাব তারসে নাঁড়াগ হায়রে হায়,
সিঞবির লঃ কান দ হায়রে হায়,
মানবির দ হাসায় ডিগিরেন......।
হায়রে হায়রে-
জারগে দাঃ রে কিকিড় বিঞ দ হায়রে হায়,
ডুবহৗ সুনুম রে সুঁওয়ৗড়ি দ হায়রে হায়,
সিঞবির দ লঃ কান দ হায়রে হায়,
মানবির দ হাসায় ডিগির এন......।"
ঠৗকুরাঃ রৗগি সেঁগেলরে মৗনমি রোগ-আজার রে ঞুর কাতে, জিউয়ী নাসাঃ রে ক পান্তেয়েনরে আরহঁ মৗনমিয়াঃ হড়ম জিউয়ী, ভুয়ৗং সাঁও তুলুচ কাতে দাঁশায় ক সেরেঞ কেদা -
"হায়রে হায়রে-
তিমিন সৗগিঞ ভায়রো গিরু নৗয় দ,
হায় হায়, তিমিন সৗগিঞ ভায়রো বাহা বাঁদেলা ।
হায়রে হায়রে-
আলাং ওডোং ভায়রো বেড়ায় রাকাব,
আলাং সেটের ভায়রো বেড়ায় হৗসুড়ঃ ।
হায়রে হায়রে-
তাঁগিঞ মেসে ভায়রো তৗগিঞ মেসে হো,
ভুয়ৗং ডৗন্টিজ ভায়রো রচৎ আকান তিঞ ।
তঁড়ে সুতৗম ভায়রো তপাঃ আকান তিঞ ।
হায়রে হায়রে-
ভুয়ৗং ডৗন্টিজ ভায়রোম জোড়োন কৗতিঞ খান,
তঁড়ে সুতৗম ভায়রোম খঁজা কৗতিঞ খান,
দেশ-দিশম ভায়রোঞ আসেন অৗচুর কেম"।
নওয়া সেরেঞ রে মৗনমিয়াঃ হড়ম রূপি ভুয়ৗং রেনাঃ ডৗন্টিজ রচৎ আকানা, জিউয়ী রূপি তঁড়ে সুতৗম তপাঃ আকানা । উনি মৗনমি ভায়রো সে ঠৗকুরে মেতায় কানা- "হে ঠৗকুর ! ভুয়ৗং ডৗন্টিচ রূপি রচৎ হড়ম যুদিম জোড়োন কৗতিঞ খান, তঁড়ে সুতৗম রূপি জিউয়ী যুদি হড়ম রেম খঁজা কৗতিঞ খান, দেশ-দিশম নওয়া হড়মতে, জিউয়ী রূপি আম ঠৗকুর ইঞ আসেন অৗচুর কেমা"। মৗনমিয়াঃ জানাম গে জিয়ন রেনাং বেড়া রাকাব, আর মৗনমি হাড়াম কাতে গচ-গুরু গে বেড়া হৗসুড় । মিৎটাং দিন সাঁওতে মিৎটাং মৗনমিয়াঃ জিউয়ীয় তুলুচ আকাদা । জিউয়ী রূপী ঠৗকুর মৗনমী হড়মো রূপতে যে হিলোঃ বসমতারেয় উয়ুঃ এনা এনহিলঃ খন মৗনমিয়াঃ জিয়ন ডাহার এহপ এনা । আর যে হিলোঃ আঢারো-বুঢারো কাতেয় গুজুঃ আন, এনহিলঃ জিয়ন ডাহার মুচৗদঃ তায়া । ত-রোগ আজাররে ঞুর আকান মৗনমি ঠৗকুরঠেন নারজঃ কানা-"হে ঠৗকুর ! রোগ আজার খনেম বেশ লিঞখান, নওয়া হড়মোরে জিউয়ী রুপতে আমিঞ আসেন অৗচুর কেমা"। নওয়া সেরেঞ রে নওয়া কাথা লৗয় আকানা ।
আর হঁ মৗনমি হড়ম রূপি ভুয়ৗং আঃ জানাম রেনাঃ কাথা দাঁশায় সেরেঞ রেক অঁড়হেঁ আকাদা-
"হায়রে হায়রে-
অকারে দ ভুয়ৗং এম জানাম লেনা রে,
অকারে দ ভুয়ৗং এম হারা লেনা রে !
হায়রে হায়রে-
খদ মাদেরে ভুয়ৗং এম জানাম লেনা রে
সাতে সৗড়িমরে ভুয়ৗং এম হারা লেনা রে ।
হায়রে হায়রে-
চেতে লৗগিৎ ভুয়ৗং এম জানাম লেনা রে,
চেতে লৗগিৎ ভুয়ৗং এম হারা লেনা রে ।
হায়রে হায়রে-
দেশ দাঁড়ান লৗগিৎ ভুয়ৗং এম জানাম লেনা রে,
দিশম সাঁঘাড় লৗগিৎ ভুয়ৗং এম হারা লেনা রে ।
হায়রে হায়রে-
সুনুমে সিঁদুর লৗগিৎ ভুয়ৗং এম জানাম লেনা রে,
বাহা টুসৗ লৗগিৎ ভুয়ৗং এ হারা লেনা রে"।
আর হঁ মৗনমি ধৗসুড় লৗগিৎ ঠৗকুর রোগ আজার রেন পোহো সে জিবাণুয় আড়াঃ লেৎ কওয়া । উনকু পোহো সে জিবাণু দিসৗ কাতে নংকা দাঁশায় ক সেরেঞ আকাদা-
"হায়রে হায়রে-
অকয় গুরু উরৗলতে পোহো দক আঁড়গয়েন
হায় হায়, অকয় চেলা বাহেরতে,
ঘানটা বাড়ে পাকাড়ে ক ডিং-ডৗবুর কেৎ ।
হায়রে হায়রে-
ধরম গুরু উরৗলতে পোহো দক আঁড়গয়েন
হায় হায়, ধরম চেলা বাহের তে,
ঘানটা বাড়ে পাকাড়ে ক ডিং-ডৗবুর কেৎ
হায়রে হায়রে-
কৗমরু গুরু উরৗলতে পোহো দক আঁড়গয়েন
হায় হায়, কৗমরু চেলা বাহের তে,
ঘানটা বাড়ে পাকাড়ে ক ডিং-ডৗবুর কেৎ ।
হায়রে হায়রে-
ভুয়ৗং গুরু উরৗলতে পোহো দক আঁড়গয়েন
হায় হায়, ভুয়ৗং চেলা বাহের তে,
ঘানটা বাড়ে পাকাড়ে ক ডিং-ডৗবুর কেৎ"।
(অনাকা কাতে ঝত গুরু ক ঞুমঃ আ)
ঘানটা বাড়ে পাকাড়ে দ মৗনমিয়াঃ হড়ম কানা । রোগ-আজার রেন পোহো ঘানটা বাড়ে রূপি হড়ম ক নাসাও কেৎ খান অনাক অঁড়হেঁ কেদা । পোহো ঘানটা বাড়ে পাকাড়ে ক ডিং-ডৗবুর কেদা-মতলব মৗনমিয়াঃ দেহ হড়মরে পোহো রূপি রোগ আজার রেন জিবাণু বলকাতে মৗনমি-ক রুয়ৗয়েনা ।
দাঁসায়রে মৗনমিয়াঃ জিউয়ি হড়ম সাঁও লুগুবুরু ঘান্টা বাড়ে তুলুচ কাতে ঠৗকুরাঃ আরাধনরে দাঁসায় ক সেরেঞ কেদা-
"হায়রে হায়রে-
হয় দ হয় লুগুবুরু রে হয়-দ হয়,
হয় দ হয় ঘান্টা বাড়ে রে হয়-দ হয়,
হায়রে হায়রে-
লুগুবুরুরে হয়-দ হিঁসিদে হিঁসিদে,
ঘান্টা বাড়ে রে হয়-দ হালায় হালায় ।
হায়রে হায়রে-
লুগুবুরু রে- দ বঁঙ্গা কুড়ি-ক
ঘান্টা বাড়ে রে- দ বঁঙ্গা কড়া-ক
হায়রে হায়রে-
বাড়ছি হাপাতে -ক টুডৗং রাকাপ-আ,
ভুয়ৗং ডান্টিজ তে -ক টুডৗং আড়গোনা ।
মানওয় জিউয়ি হড়মগে মিৎটাং লুগুবুরু কানা । নওয়া হড়মরে লুগুবুরু বারাক ঢঁডর খল হেনাঃ আন । নওয়া হড়মরেনাং খলরে মুতে হিঁসিদ হিঁসিদ হয়, হালায় হালায় হয় মেনেক সাঁহেদ বোহেলঃ কানতে মানওয়া বাঞ্চাও হেনায়া । মানওয়া জিউয়ি হড়মরে মনে ঞুতুমান লাউড়িয়ৗগে ঘান্টা বাড়ে । নওয়া ঘান্টা বাড়ে বারাক মনগে লুগুবুরু রূপি মানওয়া হড়ম জিউয়িয় পরিচলন এদা । নওয়া জিউয়ি হড়মরে শির শিরতে মেনেক তঁড়ে সুতৗমতে বঁঙ্গা কুড়ি বারাক টুডৗং রাকাপ কানা, ভুয়ৗং ডান্টিজ বারাক হড়ম বিশি জাংতে বঁঙ্গা কড়া মেনেক জিউয়ি টুডৗং আড়গোনা । অনকা লেকাতে মানমি বাঞ্চাও হেনাঃ বনা । জিউয়ি রূপি ঠৗকুরাঃ আরাধনারে দাঁসায় সেরেঞ তালাতে মানওয়া জেঁওয়েৎ হড়মরেনাং দেহত্ব আঁড়তিয়েনা ।
-আরহঁ ঠৗকরৗনাঃ কাথাতে ঝতম গুরু বঁগা ক লুগু-বুরু রেনাঃ ধিরিগড় সিনি কাপাট ঝিজ কাতে ক ওডোক এনা । অনা রেনাঃ নংকা দাঁশায় সেরেঞ রেক অঁড়হেঁয়া-
"হায়রে হায়রে-
লুগু বুরুমা ধিরিগড়সিনি,
ঘানটা বাড়ে মা ধিরিগড় কাপাট (২)
অকয় গুরুয় ঝিজ রেদ
ধিরিগড়সিনি রেঁড়ে রেঁড়ে
অকয় চেলায় লাডাগ রেদ,
ধিরিগড় কাপাট রোলে-রোলে ।
হায়রে হায়রে-
লুগু বুরুমা ধিরিগড়সিনি,
ঘানটা বাড়েমা ধিরিগড় কাপাট ।
ধরম গুরুয় ঝিজ রেদ
ধিরিগড়সিনি রেঁড়ে-রেঁড়ে,
ধরম চেলায় লাডাক রেদ
ধিরিগড় কাপাট রোলে-রোলে ।
হায়রে হায়রে-
লুগু বুরুমা ধিরিগড়সিনি,
ঘানটা বাড়ে মা ধিরিগড় কাপাট,
কামরু গুরুয় ঝিজ রেদ
ধিরিগড়সিনি রেঁড়ে-রেঁড়ে,
কামরু চেলায় লাডাক রেদ
ধিরিগড় কাপাট রোলে-রোলে ।
হায়রে হায়রে-
লুগু বুরুমা ধিরিগড়সিনি
ঘানটা বাড়ে মা ধিরিগড় কাপাট ।
ভুয়ৗং গুরুয় ঝিজ রেদ
ধিরিগড়সিনি রেঁড়ে-রেঁড়ে,
ভুয়ৗং চেলায় লাডাগ রেদ
ধিরিগড় কাপাট রোলে-রোলে ।
(নংকা কাতে ঝতম গুরু ক ঞুমঃ আ)
নঃ অয় নংকা যতম বঁগা ক লুগু বুরু রেনাঃ ধিরিগড়সিনি কাপাট খন ক ঝিজ ওডোক এন, লাডাঃ ওডোক এনতে ধৗরতি পুরী রে মৗনমি তালারে ক হেচ এনা । আর মৗনমি ক সাঁওতে গাতে কাতে নাড়া-পীড়ারে ক ঞুর আকান মৗনমিয়াঃ অড়াঃ অড়াঃ ঠৗকরানাঃ সাঁদেস সুনুম সিঁদুর আয়নম-কাজল, বাহা-টুসৗ ক আসেন অৗচুর কেদা । আরহঁ নাড়া-পিড়ারে ঞুর আকান লুগু বুরু রূপি হড়ম রেন লুগু লুমৗং রূপি জিউয়ী আঃ কাথা ক অঁড়হে কেদা । দাঁশায় সেরেঞ রে অনকা গেক সেরেঞ কেদা-
"হায়রে হায়রে-
অকয় কক চিয়ৗ লেদে
লুগুবুরু লুগু লুমৗং
ঘানটা বাড়ে লাড়ে-লুমৗং দ ।
হায়রে হায়রে-
অকয় কক সুতৗম লেদে
লুগুবুরু লুগু লুমৗং,
ঘানটা বাড়ে লাড়ে লুমৗং দ ।
হায়রে হায়রে-
মড়ে কক চিয়ৗ লেদে
লুগুবুরু লুগু লুমৗং
ঘানটা বাড়ে লাড়ে লুমৗং দ ।
হায়রে হায়রে-
তুরুয় কক সুতৗম লেদা
লুগুবুরু লুগু লুমৗং
ঘানটা বাড়ে লাড়ে লুমৗং দ ।"
নওয়া দাঁশায় সেরেঞ রে লুগুবুরু রূপী হড়মো রেন লুগু লুমং বারাক জিউয়ী দ মড়ে কক চিয়ৗ লেদায়, আর তুরুয় কক সুতৗম লেদায় । মেনেক, পিলচু হাড়াম পিলচু বুঢি রেন পোয়লৗ পংড়া মড়ে কড়া কওয়াঃ হড়মরে লুগু লুমৗং রূপি জিউয়ী ইতৗ দ তাহেঁ কানা । নুকু মড়ে ক চিয়ৗ কাতে আকঠেন নুই লুগু লুমৗং রূপি জিউয়ী ইতৗক দহ লেদায় । আর পিলচু হাড়াম পিলচু বুঢি তৗকিনরেন পোয়লৗ রেন তুরুই কুড়ি, মেনেক তুরুই ক নুই লুগু লুমৗং রূপি জিউয়ী ইতৗক সুতৗম লেদায় । মেনেক তুরুই কওয়াঃ কুখিরে নুই লুমৗং রূপি জিউয়ী সুতৗমতে তল কাতেয় হারা লেনা । তুরুই কওয়াঃ কুখিরে লুমৗং লেকা তল কাতে গিদরৗ রূপি জিউয়ীয় উয়ুঃ লেনা । অনকা লেকাতে ঠৗকুরাঃ এম মৗনমি জিউয়ী টুডৗং অৗতিঞঃ কানা । নুই জিউয়ী আঃ কাথা নওয়া সেরেঞ রে ক অঁড়হেঁ কেদা ।
আরহঁ মৗনমি হড়মরে জিউয়ী রূপি ঠৗকুর অকারে হেনায়া অনা রেনাঃ কাথা, অকারে গেবাং তঁড়েগড় পুখরি অকারে গেবাং বাহা বাঁদেলা হেনাঃ আ । অকারে তঁড়ে সুতৗমতে গাঃ আকান পুখিরি হেনাঃ আ ? অকা বাহা বাঁদেলা রে গেবাং বাহা রূপি ঠৗকুর ফোটেল হেনায় ? মৗনমিয়াঃ হড়মগে তঁড়েগড় পুখরি কানা । তঁড়ে সুতৗমতে গাঃ আকান নওয়া হড়ম রূপি পুখরি কানা । তঁড়ে সুতৗমতে গাঃ আকান নওয়া বাঁদেলা রূপি হড়মরে বাহা রূপি ঠৗকুর ফোটেল হেনায়া অনাতে মৗনমিয়াঃ হড়মগে বাহা বাঁদেলা । নওয়া বাহা রেনাঃ কাথা দাঁশায় সেরেঞ রেক অঁড়হেঁ কেদা-
"হায়রে হায়রে-
তঁড়েগড় পুখিরি রে গুরু হো পয়রৗনি বাহা দ,
বাহা বাঁদেলা রে গুরু উপৗল বাহা দ ।
হায়রে হায়রে-
ঞিদৗয় আলাং গুরু হো পয়রৗনি বাহা দ
ঞুতৗয় আলাং গুরু হো উপৗল বাহা দ ।
হায়রে হায়রে-
গুতয় আলাং গুরু হো পয়রৗনি বাহা দ
গালাং আলাং গুরু হো উপৗল বাহা দ ।
হায়রে হায়রে-
বাহা আলাং গুরু হো পয়রৗনি বাহা দ
দালে আলাং গুরু হো উপৗল বাহা দ ।"
নওয়া সেরেঞ তালাতে তঁড়েগড় পুখরি রূপি হড়মরে পয়রৗনি বাহা উপৗল বাহা রূপি ঠৗকুর ক ঞিদৗ ঞুতৗ আদেয়া । মেনেক আরাধনা সে ক ধেয়ান আদেয়া । গুতু গালাং কেদেয়াক, বাহা কেদেয়া ক, দালে কেদেয়া ক, মেনেক জিউয়ী রূপি ঠৗকুর ক সেবা কেদেয়া ।
আরহঁ বিঁদি লেকা তঁড়ে সুতৗম তে ঠৗকরৗন সেরমা পুরী খন ধৗরতি পুরীয় আঁড়গ রাকাবঃ খৗতির ঠৗকরৗন দ বিঁদি ঠৗকরৗন হঁ ক মেতায়া । পোয়লো মৗনমি পিলচু হাড়াম পিলচু বুঢি লৗগিৎ পোয়লো লুগড়ি দ ঠৗকরৗন গেয় এম লেদা । বিঁদি ঠৗকরৗন খন "দিবি ঠৗকরৗন"। অনাতে দাঁশায় দ দিবি ঠৗকরৗন পরব ক মেতাঃ আ । উনি ঠৗকরৗনাঃ লুগড়ি উইহৗর কাতে গে বাপলা রে গন-পণ চাপালারে এঁগাত লুগড়ী দ বিঁদি গানাঃ বন মেতাঃ আ । ত মৗনমিয়াঃ কৗয় গুনহৗ রেনাঃ সাজা লেকাতে ঠৗকুর মৗনমিয় ধাসাও গিডি ক রেনাঃ কাথায় বাখখো লেদরে দাঁশায় তালাতে ঠৗকরৗন আয়োয় দোঃ লেৎ বন তে ঠৗকরৗন দ দো -দুগিজ আয়ো সে দুঃ-গ হঁ ক মেতায়া । সেরমা পুরী রে নুই ঠৗকরৗনাঃ হড়ম সভায় লাগিৎ ঠৗকুর সিরজন অৗডি উতৗর কুড়ি বঁগা ঠৗকরৗনাঃ হড়মরে দুড়ুব জাপাঃ কাতে ঠৗকরৗনাঃ অঙ্গ ক সভা কেয়া । অনকু মুদরে বারয়া কুড়ি বঁগা আয়নম আর কাজল । নুকিন কুড়ি বঁগা দ ঠৗকরৗনাঃ মেৎ রে জাপাঃ কাতে ঠৗকরৗনাঃ মেৎহা কিন সভায়া । দাঁশায়রে ঠৗকরৗন যেখন মৗনমি দো-দোঃ ধৗরতি পরিরেয় আঁড়গয়েনা- আয়নম, কাজল ঞুতুম ঠৗকরৗন রেন সাপাপ বঁগা হঁ কিন আঁ আঁড়গয়েনা । অনাগে নওয়া দাঁশায় সেরেঞ রে গাবান আকানা -
"হায়রে হায়রে -দিবি দুঃগ দয় ওডোক এনারে
আয়নম কাজল দকিন বাহের এনারে
হায়রে হায়রে -চেতে লৗগিৎ দয় ওডোক এনারে
চেতে লৗগিৎ দকিন বাহের এনারে ।
হায়রে হায়রে -দেশ লৗগিৎ দয় ওডোক এনারে
দিশম লৗগিৎ দকিন বাহের এনারে ।
হায়রে হায়রে -সুনুমে সিঁদুর লৗগিৎ এ ওডোক এনারে
বাহা টুসৗ লৗগিৎ কিন বাহের এনারে ।
হায়রে হায়রে -দেলাসে দিবি দুঃগ হয় লেকাতে
দেলাসে আয়নম কাজল ভানডো লেকাতে ।
হায়রে হায়রে -অটাং হিজুঃ পেসে সেরমা সৗঁগিঞ খন
ঘুরলৗও হিজুঃ পেসে স্বরগ পুরী খন"।
নওয়া দাঁশায় সেরেঞ তালাতে দিবি ঠৗকরৗন সে দিবি দূঃগ-গ আর আচরেন সাপাপ কুড়ি বঁগা আয়নম কাজল তাক, স্বরগপুরী খন হয় ভান্ডো তালাতে ধৗরতি পুরীরে আঁড়গন লাগিৎ, নাড়া পিড়ৗরে ঞুর আকান মৗনমি ক নেহর এদা । হয় ভান্ডো তালাতে সে হয় দাঃ হুদুড় দাঃ তালাতে ঠৗকরৗন ধৗরতি পুরীয় আঁড়গ লেন খৗতির, নুই দূঃগ-গ দ "হুদুড় দুঃগ-গ" হক মেতায়া । ঠৗকরৗন রেন সাজঃ বঁগা আয়নম কাজল ঠৗকরৗন সাঁওকিন আঁড়গো লেন খৗতির নিতহঁ দাঁশায় এনেচ কড়া ক আয়নম কাজল হরঃ কাতে ঠৗকরৗন ক সাজঃ আ, আর হুদুড় ভুয়ৗং আতে দিশম দিশম দাঁড়ানা । আর সুনুম সিঁদুর সাঁও আয়নম হঁক ইদি তরায়া । অনকাতে দাঁশায় এনেচ সেরেঞ তালাতে নিতঃ হঁ মৗনমি নাড়া-পিড়ৗ খন দুক-হারকেৎ খন পারাংগত ক ঞাম এদা, সে বাড়িচ পাপ কামি খন ইকৗ ক ঞাম এদা ।
নংকা আরহঁ আডি আডি দাঁশায় সেরেঞ তালাতে, বঁগা বুরু ক অঁড়হেঁ তালাতে মৗনমি ঠৗকুর-ঠৗকরৗনাঃ সাপাপ হরঃ কাতে, ঠৗকুর ঠৗকরৗন সাজ কাতে, ধৗরতি পুরীরে উনকিন আঃ লিলৗ সে এনেজ সেরেঞ ক গাহাও কেদা । অনকা দাঁশায় চাঁদো মোলোঃ হিলঃ খন মঁড়ে মাহা আড়াঃ কাতে অড়াঃ অড়াঃ গুরু বঁঙ্গা ক আসেন কেৎ কওয়া । মুচৗদরে গুরু বঁঙ্গা ক বায় কাৎ কওয়া । মেনেক গুরু বঁঙ্গা ক সেরমা পুরীরে ক বায় কাৎ কওয়া । মৗঝি আখড়ারে মৗঝি হাড়াম উনকু গুরু বঁঙ্গা লাগিৎ সুনুম সিঁদুর লিটৗয় আঁড়গো হচ লেৎ খৗতির, মৗঝি থান মাঝি আখড়া রেগে গুরু বঁঙ্গা ক বায় কেৎ কওয়া । দেশ দিশম গুরু বঁঙ্গা আসেন কুড়ৗও কাতে, অনা মৗঝি আখড়া এনেচ বলন যহঃ নংকা দাঁশায় গুরু বায় সেরেঞ ক অঁড়হেঁ কেদা-
"হায়রে হায়রে -
গুরু হো দেশ দিশম ইঞ আসেন কেৎ মে,
গুরু হো গটা দিশম ইঞ সাঁঘাড় কেৎ মে,
গুরু হো আদ আহঞ আসেন কেমা,
গুরু হো দেলা লাং অড়াঃ তে ।
হায়রে হায়রে -
গুরু হো পুব দিশম ইঞ আসেন কেৎ মে,
গুরু হো পছিম দিশম ইঞ সাঁঘাড় কেৎ মে,
গুরু হো আদ অহঞ আসেন কেমা,
গুরু হো দেলা লাং অড়াঃ তে ।
হায়রে হায়রে -
গুরু হো উত্তর দিশম ইঞ আসেন কেৎ মে,
গুরু হো দুখিন দিশম ইঞ সাঁঘাড় কেৎ মে,
গুরু হো আদ অহঞ আসেন কেমা,
গুরু হো দেলা লাং অড়াঃ তে ।
হায়রে হায়রে -
গুরু হো বুয়ৗং তেহঞ আসেন কেৎ মে,
গুরু হো কাঁসা তেহেঞ সাঁঘাড় কেৎ মে,
গুরু হো আদ অহঞ আসেন কেমা,
গুরু হো দেলা লাং অড়াঃ তে ।
হায়রে হায়রে -
গুরু হো তিরয়ো তেহেঞ আসেন কেৎ মে,
গুরু হো বানাম তেহেঞ সাঁঘাড় কেৎ মে,
গুরু হো আদ অহঞ আসেন কেমা,
গুরু হো দেলা লাং অড়াঃ তে ।
হায়রে হায়রে -
গুরু হো পুব দিশম হঁ ঞুতৗত এনা,
গুরু হো পছিম দিশম হঁ ঞুতৗত এনা,
গুরু হো আদ অহঞ আসেন কেমা,
গুরু হো দেলা লাং অড়াঃ তে ।
হায়রে হায়রে -
গুরু হো উত্তর দিশম হঁ ঞুতৗত এনা,
গুরু হো দুখিন দিশম হঁ ঞুতৗত এনা,
গুরু হো আদ অহঞ আসেন কেমা,
গুরু হো দেলা লাং অড়াঃ তে ।
খান সেরমা পুরী খন মৗনমিয়াঃ নওয়া এনেচ সেরেঞ ঠৗকরৗন দ ঠৗকুরে উদুঃ আদেয়া । ঠৗকরৗন ঠৗকুরে মেতাদেয়া -"হেঁ ঠৗকুর, নঃ অয় ঞেলমে ধৗরতিপুরী রেন মৗনমি আলাং ক সেবক এৎ লাং আ, আলাং আঃ ক গাহাও এদা । আলাং আঃ সাজ হরঃ কাতে, আলাং আঃ লিলৗ-ক গাহাও এদা, আলাং আঃ -ক এনেচ সেরেঞ এদা । মা আদ সেঁগেল দাঃ জৗড়ি থির মে, মৗনমি চেতান খন নাড়া-পিড়ৗ রোগ-আজার চাবায় মে মৗনমি বাঞ্চাও কম । দে আমাঃ বাখখো রুয়ৗড় হাতাও তাম ঠৗকুর ।"
মৗনমিয়াঃ নওয়া ধরম কৗমি হরা তালাতে ঠৗকুর-ঠৗকরৗন চেতান মৗনমিয়াঃ ভক্তি ঞেল কাতে ঠৗকুরে তিরপিৎ এনা । আর ঠৗকরৗনাঃ কাথারে সোয়-বলাও কাতে মৗনমি চেতান খন আয়াঃ রৗগিয় রাড়েচ কেদা । মৗনমি ধৗসুড় গিডি রেনাঃ উইহৗর এ সাহা কেৎ তায়া ।
অনকা ঠৗকরৗনাঃ দায়াতে, আর উনিয়াঃ সৗহি-জুহিতে ঠৗকুরাঃ রৗগি সেঁগেল খন মৗনমি ক রুখিয়ৗয়েনা । নওয়া দাঁশায় এনেচ সেরেঞ তালাতে ঠৗকরৗন মৗনমিয় বাঞ্চাও লেৎ বনা । নিতহঁ অনা দাঁশায় ঞুতুম ধরম কৗমি হরা আব খেরওয়াল মৗনমি তালারে হেনাঃ গেয়া । দুক খন অওয়ার লৗগিৎ নওয়া দাঁশায় সিরজন লেন খৗতির নওয়া দ "দুক দাঁশায়" হঁ ক মেতাঃ গেয়া । নিতহঁ আব মৗনমিয়া ঘাঁরঞ্জ তালা রেবন ঞেল গেয়া -যে আব গিদরৗ ক অৗডি বৗড়িচ কৗয় বন কৗমি লেখান, বাবা দ অৗডি রাঁগাও কাতে, অড়াঃ খন গিদরৗয় লাগা ঞিরে রেহঁ, সে আঃ-সার চাড়হাও কাতে পৗপী গিদরৗ তুঞ গচ রেনাঃ বাখখোয় রেহঁ, আবরেন আয়ো দ বাবা-আঃ তি সাব কাতে আব গিদরৗয় দোঃ বনা । আর বাবা-আঃ রৗগিয় রাড়েজ তায়া । মৗনমিয়াঃ ঘাঁরঞ্জরে ঠৗকুর-ঠৗকরৗনাঃ অড়সং আয়ো-বাবা তালাতে অৗতিঞ আকানা । ঘারঞ্জ তালারে আয়ো-বাবা রূপরে ঠৗকুর-ঠৗকরৗন কিন মোলোঃ আকানা ।
অনাতে ঞেলঃ আ যে দাঁশায় এনেচ কড়া-ক দাঁশায় এনেচ মুচৗৎ কাতে বিদৗয়ঃ অক্ত অড়াঃ রেন আয়ো হড় ক গঁড হট আয়া । দাঁশায় দাঁড়ান কড়া কওয়াঃ গঁড আতাং লৗগিৎ অনকা উমেরান আয়ো হড় গেক সামাং অঃ আ । দাঁশায় দাঁড়ান ক যাহাঁন উমেরান গেক হোয়োঃ, উনি আয়ো হড় ক গঁড হট আয়া, চেদাঃ সে ঘাঁরঞ্জ রে নুই আয়ো হড়গে দিবি-ঠৗকরৗন রূপতে রহয় হেনায়া । হপন পারচাও কাতে দোঃ হারা ক লৗগিৎ ঝতম ঘারঞ্জ রেগে বাপলা কৗমি হরা তালাতে ঠৗকরৗন আয়ো থাপন হেনায়া । দাঁশায় এনেচ তালাতে মৗনমি দোঃ কৗমি হরারে নুই ঠৗকরৗন রূপি আয়ো গঁড জহার এ আতাং এদা । অনাতে নওয়া দাঁশায় পরব দ "ঠৗকরৗন পরব" হঁক মেতাঃ গেয়া ।
ঠৗকরৗনাঃ অৗচুতে ধৗরতি রেক আঁড়গো লেন উনকু গুরু বঁগা ক একেন সুনুম সিঁদুর আয়নম কাজল আর সাকম খান গেক তিরপিতঃ আ । নওয়াদ সানাম গে ঠৗকরৗনাঃ সাপাপ কানা সে সাজ কানা । নকু দ দাঁড়েয়াঃ মায়াম বাংক চাহাও আ, হৗঁডি বাংক চাহাও আ । অনাতে হৗঁডি পৗওর ঞু কাতে দাঁশায় এনেচ সেনঃ দ মানা গেয়া, সে দাঁশায় দাঁড়ান ওডোক কাতে হর বিররে, পেড়া কঠেন হৗঁডি পৗওরৗ ঞু দ মানা গেয়া । দাঁশায় দাঁড়ান ক সাঁও গুরু বঁগা ক হেনাঃ কতে, দাঁশায় দাঁড়ান কড়া ক হৗঁডি পৗওরৗ ঞু দ পাপ কৗমি কানা ।
নুকু গুরু বঁগা ক আতো মৗঝি রাচা খন সে মৗঝি থান খন দিশম দাঁড়ান অৗয়ুর ইদি ক হোয়োঃ আ, আরহঁ সিঁগৗড় তে অৗয়ুর অৗগু কাতে মৗঝি হাড়ামাঃ থানরে বায় কাক হোয়োঃ আ । অনাতে দাঁশায় দাঁড়ান ওডোক কাতে দাঁশায় কড়া ক বাং ক হান্তে-নাতেঃ আ । মিৎ সাঁওতে দাঁশায় এনেচ-ক ওডোকঃ আ, আর মিৎ সাঁওতে সিঁগাড়তে ক রুয়ৗড়া । চেদাঃ বাংমা দাঁশায় এনেচ কড়া-ক ঠৗকুর,ঠৗকরৗন-ক সাজ আকানা, আর আকো সাঁও গুরু বঁগা ক হেনাঃ কওয়া ।
ত অনকা দাঁশায় কৗমি হরা তালাতে, নাড়া-পিড়া রে ঞুর লেন মৗনমি তালারে ঠৗকরৗনাঃ সাঁহি জুহিতে, ধরম গুরু আঃ কৗমিহরা তালাতে, মৗনমি জিউয়ী তালারে ধরম থাপন এনা । কৗমরু গুরু আঃ অৗয়ুর তে রান-মুরগৗন সেঁড়া কাতে মৗনমিয়া রোগ-বিঘিন চাবায়েনা । ভুয়ৗং গুরু আঃ অৗয়ুর তে মৗনমিয়াঃ হড়ম রে জিউয়ী খঁজা কাতে এনেজ সেরেঞ ক সেঁড়া কেদা । আর হঁ অনকা এটাঃ গুরু বঁগা কওয়াঃ অৗয়ুর তে মৗনমিয়াঃ নাড়া-পিড়ৗ মুচৗৎ এনা । ধৗর্ত্তিপুরিরে মৗনমিয়াঃ পোয়লো সেরেঞ হোয়োঃ কানা -নওয়া দাঁশায় সেরেঞ । নওয়া সেরেঞ পোয়লো তারকো লেনা হাঁস-হৗঁসিলাঃ রধন তালাতে । পোয়লো মানওয়া হপন যেখন দরয়া তালারে পায়রানি সাকামরে হারা হামাল কাতে কিন ডুবুজ ডুবুজঃ কান তাঁহেন, উনরে হাঁস-হৗঁসিল চেঁড়ে উনকিন মানওয়া মিৎটাং কাতে দেয়ারে গুরু কাতে সেরর্মা চটরে গেলবার বছর উডৗও-উডৗও তেকিন রধন লেৎ দ, অনা হঁ দাঁশায় সেরেঞ ।
"হায় হায় জালাপুরি রে
হায় হায় জালাপুরি রে........
হায় হায় মৗনমি জানামলেন ।
হায় হায় অকারেলিঞ দহকিনা
হায় হায় মৗনমি হপন-দ
হায় হায় জালাপুরি রে ।"
পুথি :- সৗরিধরম গ্রন্থ জমসিম বিন্তী রেয়াঃ সার কাথা ঠৗকুর গে সৗরি সারজম -সোমাই কিস্কু । (১১৬ - ১৩৫)
0 Comments