বাঁহা বঙ্গা - Baha Bonga (পার্ট—৩)



বগা বুরু ক সাঁওতে সানাম কগে রসিকৗ বাড়া কাতে আদ বগা কক সুমৗন কওয়া। নায়কে সাঁওতে সানাম কগে কলৗয়া, “মা গঁসাই আদ আকাস কঃ পে, সাদম কক লাগা চাবা আকানা....” । এনখান গে আদ বগা ক মিৎ-মিতে থান রেক তাবের গদঃ আ। নায়কে আদ, বারয়া লুতুররে, সােপােরে, কড়াম রে আর দেয়ারে মিদ টিডৗঃ কাতে সিঁদুর এ্ লাঠা আকওয়া। অনকা কাতে বগা ক সুমৗন বাড়া কাতে আদ সােড়ে কক ইসিনা। বহঃ দ নায়কে আর আতাে হড় কদ দাঁড়ে কওয়াঃ হড়ম জেল্ ক সােড়েয়া। বহঃ সােড়ে ইসিন লেনখান, নায়কে দ অনকাগে বাঁখেড় তালা তে খড় করে অনাক দয় আঁড়গাে কাঃ আ। উনগে মারাং বুরু ঞতুম্ তে তাং হাঁডি সারজম সাকাম রেনাঃ বেনাও ফুড়ুঃ তে অৎরে আদয় চডরা। উন অক্ত রেনাঃ বাঁখেড়

 জহার ‘সাই মারাং বুরু

 মা এনখান নঃ অয় বাহা ঞূতুম্ তে,

 রান দাঃ তাপান দাঃ লে

 এম আম কান চাল আম কান গসাই

সুকতে সাঁওয়ার তে আতাং কাঃ তেলা মে গসাই

নায় বাড়ে নাপায় বাড়ে গঁসাই ।

মা গঁসাই এনখান দাঃ জৗড়ি ক বাড়ে লগনতে

আঁড়গাে আগূ  কাঃ মে বাড়ে গঁসাই ,

সানাম কগে অনে নায়তে নাপায় তেলে তাঁহে কঃ মা,

নায় বাড়ে নাপায় বাড়ে গঁসাই ।

.নিয়ৗ তায়ম আদ হাঁন্ডি ক-ক ঞয়া (হাঁন্ডি দ মিদ ফুড়ুঃ খন জৗসতি ঞ দ ধরম বিরুদ কৗমি কানা) আর সানাম কগে সােড়ে কক জম হাঁটিঞা । আতো হড় কদ জাহের টান্ডি খন বাগি হট কাতে মিদ্ বার হড় আড়াঃ তেক ক চালাও দাড়েয়াঃ আ । মেনখান নায়কে দ তিন হাবিচ অড়াঃ তে বাংক ইদিয়েয়া উন ইৗবি জাহের টন্ডি বাগি কাতে উনিদ চালাঃ দ একালগে বাং গানঃ তায়া। তারাসিঞ বেড়া সানাম আতাে হড়তে তুমদাঃ টামাক আতে নায়কে আদ অড়াঃ তেক ইদিয়েয়া । উন অক্ত রেক সেরেঞা - -

“হর ধারে রে, হর ধারেরে হাট বাহা দৗইনা....।

গুতুয় আলাং ঝংকা ঝাকুর দৗইনা

 বাহায় আলাং দালায় দালায়

বির ধারে বির ধারে রে

 লাডয়া তেরেল তেং জা .

 আদ-দ জতাম জা তোং জা.

আদ দহবর তরায় তাম ..।”

অনকাগে আরহঁ ক সেরেঞ সাঁও তরা আঃ আ............ 

“সকড়া রে সকড়া রে বানা দনা দৗইনা 

বানা দনা,বানা লিসয় লসয়

বানা দনায় দৗড়হিআকানা ............”

অড়াঃ ছাটকায় সেটের লেনখান নায়কে দ, আতাে রেন সানাম তিরলৗ হড় কতে আদ জাঁগা ক আরুব এয়া। জাঁগা আরুব কাতে ক গড জহার আয়া আর নায়কে ঠেন বাহা ক আতাং আ। নায়কে বাহায় এমা কওয়া আর বহঃ রে সৗগুন ঠিলি রেনাঃ দাঃ কৗটি এ্ দুল আকওয়া। জাঁগা আরুব হুয় লেনখান গে নায়কে আদ অড়াঃ তেয় বলনা। বাহা সৗরদি হিলঃ কৗমি দ ইনৗ খান গে মেটাঃ আ। দসার হিলঃ দ বাকে সেঁদরা কড়া ক সেতাঃ তরা সেঁদরা লৗগিৎ ক উডুকঃ আ। সেঁদরা খন রুওয়ৗড় হে কাতে, মৗঝি অড়াঃ রে উনকু-দ জাঁগা ক-ক অরুব কতে হাঁডি কক এমা কওয়া। অনা তায়ম খন গে এতহবঃ আ আদ বাস্কে মাহা। বাহা সেরেঞ আর মাঃ মড়ে সেরেঞ অঁড়হে দ মি আন গেয়া। চেদাঃ সে উনকু বগা কগে কম তরা কওয়া। বগা বুরু রেনাঃ নেয়াম কামি কান গেয়া। অনে লাহা রেগি লৗই আকাৎ, ফারাক দ হুয়ুঃ কানা বাহা রেদ কৗটি দাঁড়ে আর মাঃ মড়ে রেদ সেঁড়া দাঁড়ে । বাহা রেদ নায়কে গে ঝতম দাঁড়ে কওয়াঃ হটঃ গেৎ তপাঃ কাতে (জাহের এরা ঞতুম তেনি আঃ তেৎ দ বাং তপাগঃ আ) খডরে মায়াম এ্য জরয়া। মেনখান মাঃ মড়ে রেদ পোঁড় বদা দ মারাং বুরু গেয় মাগেয়া । বাড়ায় তাঁহেন মম বাহা আর মাঃ মড়ে বঁগাঃ রেদ জাহের এরা আঃ গে লাহা রে খড় দ বেনাও হুয়ুঃ আ । আর জাহের এরা গে লাহা তেদ এমায় হুয়ুঃ আ। অনা তায়ম মারাং বুরু, মড়ে ক তুরুই ক, গোঁসাড়ে মৗঝি বঁগা আর গোঁসাই এরা। বাহা আর মাঃ মড়ে বঁগা বেগর এটাঃ অক্ত রেনাঃ বগা করে দ মারাং বুরু গেয়, লাহাঃ আ। নওয়া কিন রেনাঃ কৗমি অক্ত রেদ জাহের এরা গেক লাহা আকাদেয়া, উনি বাবা ঈশ্বরাঃ লৗই লেকাতে। চেদাঃ সে হানে পৗহিলঃ — দে বংশ যদু বংশ কওয়াঃ অড়াঃরে লিটী মেনেদ “মারাং বুরু” ছুঁত মুকুৎ এ্যা চালাও লেৎ খাতির জাহের এরায় এগের লেৎতে উন অক্ত উনি মারাং বুরু দ পাতাল পুরি তেয় ঞির বললেন তাঁহেৎ। মারাং বুরুয় ঞির বললেন রেদ, জাহের এরা গে উনিদ পাতাল খনে পাঁজা অৗগু লেদেয়া। অনাতেয় কুসি লেন খাতির গে বাবা ঈশ্বর দ সানাম বঁগা বুরু কঠেন এ্য লৗই পাশনাও লেৎ আ..., বাহা বঁগাঃ রেদ জত হড় ক খন লাহাতে সেবা দ “জাহের এরা” গেয় ঞাম — মা বাড়ে।

💠 নওয়া দ বাহা বঁঙ্গারেনাঃ মুচাদ সাতাম কানা 💠