পিলচু হাড়াম পিলচু বড়হি রেন কড়া - কুড়ি বাপ্লা কাথা
লেখক ঃ রামদাস টুডু, রৗস্কৗ পুথি খন তুমৗল
✺ উন দিন উন জখান মারাং বুরু আয়াঃ মনে রে-ই বিচার লেদা নওয়া অত রেমা খেরওয়াল বংশ মানওয়া গে বানুঃ কওয়া।
নুকিন দ অকয় সাও ইঞ বাপলা কাকিনা, যাও গে হুয়েন বয়হা মিশরা গিঞ বাপ্লা কাকিনা ।
উনরে মারাং বুরু-ই মেন কেদা এ নাতি আদোওয়াতে শাগাৎ চাওলে হুড়ুং হাতাড় বিন ইঞ দ রানু রান আগুঞ চালাঃ কানা।
ওনা লাই কাতেৎ আগুই চালাও এনা হর রে মিঃ টাং হাঁডু হাড়ামে গিতিচ আকানা আদ খান উনি-ই মেতায় কানা এ ভাগিনা চেদাঃ এম গিতিচ আকানা ।
উনরে তেলায় ঞাম কেদা এ মামোঞ বুল আকানা।
মারাং বুরু-ই মেমেন কানা এ ভাগিনা চেঃ লেকাতেম বুল আকানা।
তেলারে এ মামো টাটি ঝারি মুডু রেয়াঃ দাঃ ইঞ ঞু লেদা।
উনরে মারাং বুরু-ই মেন কেদা তোবে ভাগিনা দেলা সে ইদিঞ মে ইঞ হঁ।
আদ উনি হাডু হাড়াম মারাং বুরু-ই ইদি কেদেয়া অনা টাটি ঝারি মুডুতে মারাং বুরু-ই উদুঃ আদেয়া আরে মেনেৎ কানা অঁডেনাঃ দাঃ মামোঞ ঞু লাঃ আ।
মারাং বুরু-ই ঞেল কেদা অনা রান রেহেদ দাঃ রে জবে আকানা অনা রেহেদ আগু কাতেঃ মারাং বুরু-ই হেজ এনা আদ অনা রেহেদ তেগে রানু ক বেনাও কেদা।
অনা রহড়ে না আদ মারাং বুরু পিলচু হাড়াম আর পিলচু বুড়হী-ই মেতা কিন কানা এ নাতি জড়তে হাঁডি দহয় বিন।
আদ কিন কুকলি কানা এ বুড়া বাবা চেৎ লেকান জড় হাঁডি ।
আদ-ই লাই কেদা এ নাতি বারেয়া টুকুজ রে দহয় বিন।
আদ পিলচু হাড়াম পিলচু বুড়হি সাঁওতে হাঁডি কিন দহ কেদা ।
অনা হাঁডি পে মাহারে খান গে ইসিনেনা।
আদ মারাং বুরু-ই হেজ এনা আরে কুলিয়েৎ কিনা চেলে নাতি হাঁডি দ ইসিনেনা সে বাং।
আদকিন মেন কেদা এ বুড়া বাবা বাড়িই গে সাডে কানা ।
আদ-ই মেন কেদা তোবে ইসিনাকানা মা দাঃ আ বিন আদ অনা দাঃ কাতেৎ তাং কেদা ।
আদ-ই মেতা কিন কানা নওয়া দ বাপলা ঞুতুম তেবন বঙ্গায়া।
আদ কিন লায়েৎ কানা এতে বুড়া বাবা অকয় বন বঙ্গা আয়া।
আদ-ই মেন কেদা এ নাতি মারাং বুরু।
আদ অনা হাঁডি তাং কেদা ক বডচ কেৎ তেক সানাম ক ঞু চাবা কাতেৎ ক বুল এনা উন দিন উন জখান উন অক্তে বুল আকান কিন জখান মারাং বুরু পিলচু হাড়াম আর পিলচু বুড়হি বয়হা গেই বাপলা লেঃ কিনায়।
উনকিনে বাপলা লেৎ কিন তায়ম খানগে গেলবার সেরমা দাঃ বায় জাড়ি লেদা । উন যখান মারাং বুরু-ই মেন কেদায় নংকা আওড়ি দ তিস হঁ আলপে ঞুয়া নংকা আওড়ি ঞু দ কামি বাড়িজঃ আ হাঁডি একাল ফুড়ুঃ সুমুং বঙ্গা সুমুং গে।
0 Comments