Santali Traditional Dance
আব সান্তাড় সাঁওতারে লাঁগড়ে এনেচ সেরেঞ হঁ মিৎ ঞুমানাঃ কান গেয়া। আব হড় হপন দ আডি রুসিকা মানওয়া কানা বন। নুকু আকান মিমিৎ শির রেয়াঃ মারাং রে রৗস্কৗ অসান্তেড় ধারা বিজলী লেকা এনেচ বাড়ায়ঃ কানা। আর অনা ইয়ৗতে গে নুকুওয়াঃ মিমিৎ তাড়াম খন হঁ সেরেঞ তার্কো, হারা-বুরু কাতে হঁ ভাঁডান যখন দিশৗ লেখান গরব কাতে বন লৗয় দাড়েয়াঃ আ যে হড় হপন দ রৗস্কৗ সারেড় মানওয়া কানা ক। নুকুওয়াঃ জিয়ন দ সেরেঞ রেয়াঃ মিমিৎ লিকির তে আভরান আকানা।
মেনখান নওয়া রেয়াঃ মানে দ নওয়া দ বাং কানা যে হড় হপনাঃ জিয়নরে রেঁগেচ, তেতাং, দুখ, সুখ আর সারকেৎ সাসেৎ দ বানুঃ আ। চৗইয়-চাম্পা গাড় খন বিডরৗও আকান খন নিত হাবিচ হড় হপন দ রেঁগেচ-তেতাং রেয়াঃ লল সেঁগেল চেতান তেগেক তাড়াম কানা, মেনখান সেরেঞ রেয়াঃ অন্তর আতকির রৗড় তিন রেচ অনা দুখ দরয়া খন দয় বুলৗও পারমেৎ কওয়া। হড় হপন দ দুখ-হারকেৎ রেয়াঃ সড়ম সাডে হপন দ সাসেৎ আর হারকেৎ রেয়াঃ দরয়া রেঁহ ক চিনরেচ অনা উডু-ডুবুঃ গঃ দরয়া খন দয় অওয়ার পারমেৎ কওয়া। হড় হপন দ সাসেৎ আর আর হারকেৎ রেয়াঃ দুগুর-দুগুর জোলোঃ কান সেঁগেল খন হঁয় মুহ্নী পারম এৎ কওয়া। আর অনা ইয়ৗ তেগে হড় হপন দ যাঁহা ক রেগে অড়াঃ দুওয়ৗর তেঁঙ্গো আকাৎ আর ঘুটু রেগে ক তেঙ্গো আকাৎ আ। যাঁহা রেগে নুকু জৗত দ আতো ক বান্ধাও আকাৎ আ। আর হড় হপন লাঁগা লাগায় লাগিৎ আক মনে আক স্থান ক এনেচ দাড়েয়াঃ। নংকান জায়গারে দ জাপুৎ যখন হঁ মনে আডি বিকল লেনরে আডি রৗস্কৗ তেক এনেচ দাড়েয়াঃ।
হড় হপন দ আয়মা লেকান সেরেঞ ক মেনাঃ তাকওয়া। অক্ত অক্তরে উনকু সেরেঞ দক সেরেঞা। লাঁগড়ে দ অনাক মুদরে গে মিৎ সেরেঞ কান গেয়া। সেরেঞ ক মুদরে লাঁগড়ে গে মিৎটেন আ। যেলেকা এটাঃ জৗত দ বারোমাস গেলবার চাঁদো রেয়াঃ সানাম দিনক লাঁগড়ে ক সেরেঞা। নারতারে, ছৗটয়ৗর রে, টাকা চাল রে, গিরৗ তলরে, বাহু বান্দেরে, বাপ্লা বিহারে, যাঁহা বাং যাঁহা ঘাড়িরে গে লাঁগড়ে দক সেরেঞ আঃ গেয়া।
লাঁগড়ে দ বির-বুরু, ছাতা-পাতা টাঁডিরে তিনৗঃ কুসি রৗস্কৗ তেগে আতো অড়াঃ রে হঁক সেরেঞা। নুনৗঃ হাবিচ যে গচ-গুর লেন রেঁহ ভাঁডান যখান আর গচ কারাম যখন লাঁগড়ে দ হড়াঃ লুটি রেগে তাঁহেন কানা। হড় হপন নিত হাবিচ তে তিনৗঃ সেরেঞ ক জড়াও আকাদা,অনাক মুদরে জানিচ লাঁগড়ে গে ঝত খন ঢেরা।
লাঁগড়ে সাবাদ রেয়াঃ অনুমান দ অকা লেকাতে হোয় আকানা, নওয়া দ আয়মা বিন্তি গুরু কঠেন আঁজম বাড়ায় আকানা অনাদ লাঁগড়ে সাবাদ রেয়াঃ অনুমান দ বারয়া সাবাদ মিৎ "লাঁগা" আর মিৎ অকা সেরেঞ ক গাঃ লেদা অনাগে লাঁগড়ে সেরেঞ ব মেতাঃ কানা। "লাঁগা-এড়ে" সাবাদ গে রড় রড়তে লাঁগড়ে এনা আর নিত দ লাঁগড়ে মেনতে গেবন বাড়ায় এদা।
হড় হপনাঃ লাঁগড়ে সেরেঞ অকা যুগরে অন্তর অড়াঃ খন তারকো অডোক মাড়াং আকানা, অনাহঁ ঠিক লৗই দ মুসকিল গেয়া। মেনখান লাতার রেয়াঃ সেরেঞ তালাতে বাড়ায়ঃ কানা যে লাঁগড়ে দ হড় হপন হিহিড়ি-পিপিড়ি রে আয়মা বৗড-বোরকেৎ এনখান আডি ক সাঁঙ্গে লেনা আর ক উৎনাও লেনখান আডি ক সেরেঞ এৎ তাঁহে কানাঃ-
তাঁহারেতা নানা তারনা নানারে
তাঁহারেতা না নানা রে।
তাঁহারেতা নানা তারনা নানারে
তাঁহা রেতা না নানা রে।
তকা রে দ নমন লেনা লাঁগড়ে?
অকা রে দ বাসৗড় লেনা লাঁগড়ে?
লাঁগা এড়ে লাঁগড়ে।
লাঁগা এড়ে লাঁগড়ে লাঁগা এড়ে লাঁগড়ে দ?
হিহিড়ি রে নমন লেনা লাঁগড়ে,
পিপিড়ি রে বুসৗড় লেনা লাঁগড়ে,
লাঁগা এড়ে লাঁগড়ে-
লাঁগা এড়ে লাঁগড়ে দ।
0 Comments